ऑडीचालक होता मद्यधुंद, अर्जुनने बायकोला पाठवले लाईव्ह लोकेशन, नागपूर ऑडी अपघात प्रकरणात मोठी अपडेट

रामदासपेठ परिसरातील वाहनांना धडक देणारा ऑडीचालक अर्जुन हावरे हा मद्यधुंद असल्याची माहिती रक्त तपासणीच्या अहवालातून प्राप्त झाली आहे. पोलिसांनी अर्जुनला अटक केल्यानंतर त्याची जामिनावर सुटका करण्यात आली आहे. भाजपचे प्रदेशाध्यक्ष चंद्रशेखर बावनकुळे यांचा मुलगा संकेतच्या मालकीच्या ऑडी कारने रविवारी मध्यरात्री रामदासपेठेतील वाहनांना धडक दिली. या गाडीत संकेत असल्याने राजकीय वातावरण तापले आहे.संकेत, अर्जुन व रोनित अजय चित्तमवार हे बालमित्र आहेत. रविवारी दिवसभर अर्जुन व रोनित हे संकेत याच्या धरमपेठेतील कार्यालयात सोबत होते. रात्री ११ वाजताच्या सुमारास अर्जुनने त्याची कार संकेतच्या चालकाला दिली. त्यानंतर अर्जुन, संकेत व रोनित हे तिघेही ऑडीने रात्री १२.२० वाजताच्या सुमारास धरमपेठेतून निघाले. याचदरम्यान काचीपुरा परिसरात संकेत हा सनरुफमधून उभा राहिला. काचीपुऱ्यातून रामदासपेठेत येताच ऑडी कारचालकाने जितेंद्र शिवाजी सोनकांबळे (वय ४५, रा. धंतोली) यांच्या एमएच ३१ ईके ३९३९ क्रमांकाच्या कारला धडक दिली. तत्पूर्वी ऑडीने एमएच ४९ झेड ८६३७ क्रमांकाच्या कारला व मोपेडसह चार वाहनांना धडक दिली. यात मोपेडस्वार दोन तरुण जखमी झाले. कारला मागून धडक दिल्यानंतर ऑडीचे डाव्याबाजूचे टायर फुटले. त्यानंतरही अर्जुनने ऑडीचा वेग वाढवला. याचदरम्यान अर्जुनने एका पोलो कारलाही कट मारला. सीताबर्डीत पोहोचताच संकेतने मित्राला फोन करून मानकापूर टी-पॉइंट परिसरात बोलावले. त्याचा मित्र मानकापूर परिसरात कार घेऊन आला. अर्जुनने कार थांबविली. संकेत कारमधून बाहेर निघाला व मित्राच्या कारमध्ये बसून पसार झाला, अशी माहिती पोलिससूत्रांनी दिली.मानकापूर परिसरात ऑडी थांबविल्याने पोलो (एमएच ०२ सीएच ७७६५) कारने मोहम्मद फैजान व त्याचे दोन साथीदार तेथे आले. त्यांनी अर्जुन व रोनितला ऑडीतून बाहेर काढले. पोलोत दोघांना डांबून तहसील पोलिस ठाण्याच्या हद्दीतील टिमकीत घेऊन गेले. याचदरम्यान अर्जुनने पत्नीला मोबाइलवर लाइव्ह लोकेशन पाठवून घटनेची माहिती दिली. टिमकीत तिघांनी रोनित व अर्जुनला मारहाण केली. त्याच्याकडील सोनसाखळी व सोन्याचे ब्रेसलेटही हिसकावले. अर्जुनच्या नातेवाइकांनी पोलिसांना माहिती दिली. लाइव्ह लोकेशनच्या आधारे तहसील पोलिस टिमकी येथे पोहोचले आणि अर्जुन व रोनितची सुटका केली.रामदासपेठेतील ‘हिट अॅण्ड रन’ घटनेतील आरोपी अर्जुन व रोनितच्या रक्त नमुन्याची तपासणी केल्यानंतर ते मद्यधुंद होते, असे स्पष्ट झाले आहे. पोलिसांनी ४८ तासांत संकेतच्या रक्ताचे नमुने का तपासले नाही? पोलिस कुणाला वाचवत आहेत का? असा सवाल विधानसभेतील विरोधीपक्षनेते विजय वडेट्टीवार यांनी केला. पोलिसांकडून सखोल चौकशी सुरु आहे. रामदासपेठेत ऑडी कोण चालवित होते, हे तपासण्यासाठी संपूर्ण परिसरातील सीसीटीव्ही जप्त करण्याचे काम सुरू आहे. सीसीटीव्हीची तपासणी केल्यानंतर कार अर्जुन चालवित होता की संकेत हे स्पष्ट होईल, असे एका अधिकाऱ्याने सांगितले.‘पोलिस सगळे काही शोधून काढत आहेत. चौकशी करीत आहेत. या घटनेवरून विरोधक चंद्रशेखर बावनकुळे यांना ज्यापद्धतीने टार्गेट करीत आहेत ते चुकीचे आहे’, अशी प्रतिक्रिया उपमुख्यमंत्री देवेंद्र फडणवीस यांनी व्यक्त केली.