मुंबई: दरवर्षीप्रमाणे यंदाही दहादिवस भाविकांसोबत घालवल्यानंतर लाडका बाप्पा आज निरोप घेत आहे. अनंत चतुर्दशीच्या दिवशी मुंबईतील प्रसिद्ध लालबागचा राजाची विसर्जन मिरवणूकही सुरु झालेली आहे. राजा आपल्या मंडपातून बाहेर पडला आहे. यापूर्वी लालबागच्या राजाच्या मंडपात विसर्जन मिरवणुकीची तयारी करत सुरु असताना कुणीतरी राजाच्या पायावर एक पत्र आणून ठेवली. या पत्राने राजकीय वर्तुळात एकच खळबळ माजली आहे. काय आहे या पत्रात असं ज्यामुळे राजकीय वर्तुळात चर्चांणा उधाण आलं आहे.
या पत्रामध्ये विधानसभा निवडणुकीबाबत असं काही लिहिलं होतं, ज्यामुळे याची चर्चा सुरु आहे. या पत्रात आगामी विधानसभा निवडणुकीत ठाकरे गटाच्या उमेदवाराबाबत लिहिण्यात आलं आहे. यामध्ये ज्या उमेदवाराचं नाव लिहिण्यात आहे त्यामुळे ठाकरे गटात खळबळ माजली आहे. लालबाग परिसर हा शिवडी विधानसभा मतदारसंघात येतो. शिवडीत ठाकरे गटाचे अजय चौधरी हे आमदार आहेत. येत्या निवडणुकीतही ते उमेदवारीसाठी इच्छूक आहेत. पण, लालबागच्या चरणी ठेवलेल्या पत्रात सुधीर साळवी यांचं नाव लिहिलेलं आढळलं. ‘शिवसेना (उद्धव बाळासाहेब ठाकरे) शिवडी विधानसभा २०२४ आमदार सुधिर(भाऊ) साळवी’ असे या पत्रात लिहिलेलं होतं.साळवी यांच्या समर्थकांनी हे पत्र राजाच्या चरणी ठेवल्याची माहिती आहे. साळवी यांना २०२४ च्या विधानसभा निवडणुकीत शिवडी येथून आमदार होऊ दे अशी इच्छा या समर्थकाने राजाच्या चरणी केली आहे. आज पहाटेच्या सुमारास साळवी समर्थकाकडून हे पत्र लालबागच्या राजाच्या चरणी ठेवल्याचं सांगण्यात येत आहे.एकनाथ शिंदे यांनी केलेल्या बंडानंतर जे निष्ठावंत उद्धव ठाकरेंसोबत थांबले त्यांच्यामध्ये अजय चौधरी यांचाही समावेश होता. तर, सुधीर साळवी हे देखील ठाकरेंने निष्ठावंत आहेत. तसेच, ते यंदा होणाऱ्या विधानसभा निवडणुकीसाठी विधानसभा मतदारसंघातून उमेदवारीसाठी इच्छुक आहेत.सुधीर साळवी हे लालबागचा राजा सार्वजनिक मंडळाचे सचिव आहेत, त्यामुळे त्यांना मानणारा वर्गही मोठा आहे. त्यांच्या कुठल्या समर्थकानेच ते आमदार व्हावेत यासाठी राजाकडे साकडं मागितल्याचं या घटनेवरुन दिसून येत आहे. आता उद्धव ठाकरे हे सुधीर साळवी यांना संधी देणार की अजय चौधरी यांना पुन्हा उमेदवारी देणार हे लवकरच कळणार आहे.
Users Today : 17