मुंबई
संपूर्ण गणेशोत्सव नामानिराळे राहिलेले राष्ट्रवादी काँग्रेसचे अध्यक्ष अजित पवार यांनी सोमवारी मुंबईतील लालबागचा राजा, चिंचपोकळीचा चिंतामणी आदी सार्वजनिक गणेशोत्सव मंडळांना भेट दिली. त्यानंतर पवार यांनी उपमुख्यमंत्री देवेंद्र फडणवीस यांच्याही घरातील गणेशाचे त्यांनी दर्शन घेतले. मात्र, मुख्यमंत्री एकनाथ शिंदे यांच्या घरी मात्र पवार यांनी सोमवार सायंकाळपर्यंत भेट दिली नव्हती. देशाचे गृहमंत्री मुंबईत असतानाही गायब असलेल्या पवार यांना कारण विचारले असता, आपल्यामुळे गणेश दर्शन करायला येणाऱ्या जनतेची गैरसोय होऊ नये म्हणून इतके दिवस मंडळांना भेट दिली नसल्याचे कारण यावेळी पवार यांनी सांगितले.गणेशोत्सव सुरु झाल्यापासून अजित पवार यांनी मुंबईत असूनही एकाही सार्वजनिक गणेशोत्सव मंडळांला भेट दिली नाही. तसेच देशाचे गृहमंत्री अमित शहा, भाजपचे अध्यक्ष जेपी नड्डा हे मुंबईत असतानाही त्यांनी दौऱ्यापासून दूर राहणे पसंत केले. मात्र, अमित शहा दिल्लीस परतताना पवार यांनी त्यांची विमानतळावर भेट घेत आगामी विधानसभा निवडणुकीबाबत चर्चा केली. परंतु, अजित पवार मुख्यमंत्री एकनाथ शिंदे, आणि उपमुख्यमंत्री देवेंद्र फडणवीस यांच्या घरीही गणेशदर्शनासाठी गेले नव्हते.दरम्यान, सोमवार सकाळी पवार लालबागच्या राजाच्या दर्शनाला गेले, त्यानंतर चिंचपोकळीचा चिंतामणी, माझगावचा राजा अंजिरवाडी गणेशोत्सव मंडळ या ठिकाणी गेले. त्यानंतर सिध्दीविनायक मंदिरातही ते गेले. त्यानंतर पवार यांनी उपमुख्यमंत्री देवेंद्र फडणवीस यांच्या सागर या शासकीय निवासस्थानी जाऊन त्यांनी गणेशाचे दर्शन घेतले आणि आरतीतही भाग घेतला. मात्र, अवघ्या काही मीटरवर असलेल्या मुख्यमंत्र्यांच्या वर्षा या निवासस्थानापासून मात्र त्यांनी अंतर राखले होते.गणेशोत्सवादरम्यान असलेल्या अनुपस्थितीबद्दल पवार यांना विचारले असता, गणेशोत्सव मंडळांना भाविक सहकुटुंब येतात. त्यात आमच्यासारखे व्हीआयपी आले की त्यांना थांबवावे लागते. त्यामुळे नाराजी पसरते म्हणून सोमवारची सकाळ निवडल्याचे त्यांनी स्पष्ट केले. आज कामाचा दिवस आहे आणि अनेकांनी शनिवार-रविवारी गणेशाची भेट घेतली त्यामुळे आज निवांत दर्शन घेता आले, असेही पवार यांनी स्पष्ट केले.मुख्यमंत्री एकनाथ शिंदे यांच्या घरच्या गणेशाला करण्यात आलेल्या आरासमध्ये विविध सरकारी योजनांचा देखावा साकारण्यात आला आहे. मात्र देखाव्यांमधून अजित पवार गायब असल्याचे दिसून आले होते. त्यातच मंत्री तानाजी सावंत यांनीही पवार यांच्यासोबत कॅबिनेटमध्ये बसून आल्यानंतर उलटी होते अशाप्रकारचे वक्तव्य केल्यापासून पवार-शिंदे यांच्यात काही आलबेल नसल्याची चर्चा आहे. त्यातच पवार त्यांच्या घरी दर्शनासाठी न गेल्याने या चर्चेला अधिक जोर चढला आहे.
Users Today : 17