मुंबई : महायुतीत एखाद्या आमदाराचा सर्व्हे निगेटिव्ह आला, तर त्या जागेवर दुसऱ्या उमेदवाराला तिकीट देण्यात येईल, पण त्याच पक्षाला संधी मिळणार, अशी माहिती उपमुख्यमंत्री आणि राष्ट्रवादी काँग्रेसचे नेते अजित पवार यांनी आपल्या आमदारांना दिली. स्थानिक पातळीवर महायुतीतील नेते आणि कार्यकर्त्यांसोबत जुळवून घ्या, अशा सूचनाही अजितदादांनी दिल्या आहेत.
महायुतीची बैठक
विधानसभा निवडणुकीतील जागावाटपाबाबत चर्चा करण्यासाठी महायुतीच्या नेत्यांची २४ आणि २५ सप्टेंबर रोजी दोन दिवसीय बैठक आयोजित करण्यात आली आहे. महायुतीत ज्या जागांवर रस्सीखेच आहे, त्या जागांवर यावेळी चर्चा होणार आहे. त्यावर तोडगा न निघाल्यास केंद्रीय गृहमंत्री अमित शाह यांच्या नेतृत्वात दिल्ली दरबारी महायुतीच्या दिग्गज नेत्यांची बैठक होणार आहे….तर दुसऱ्या उमेदवाराला तिकीट
अजित पवारांची राष्ट्रवादी विधानसभेच्या ७० हून जास्त जागा लढणार असल्याची माहिती मिळत आहे. राष्ट्रवादीच्या तिकिटावर गेल्यावेळी ५४ आमदार निवडून आले होते. सीटिंग आमदारांना पुन्हा संधी देण्याचा कल असेल. मात्र एखाद्या आमदाराचा सर्व्हे निगेटिव्ह आला, तर त्या जागेवर त्याच पक्षातील दुसऱ्या उमेदवाराला तिकीट देण्यात येईल, असं महायुतीच्या नेत्यांचं ठरलं आहे. या व्यतिरिक्त राष्ट्रवादीची ताकद अधिक असलेल्या किमान १६ जागा पदरात पाडून घेण्यात अजित पवार यांना यश आल्याचं दिसत आहे.दरम्यान, अमित शाहांनी भाजप नेत्यांना राष्ट्रवादीसोबत जुळवून घेण्याचा सल्ला दिला होता. त्यानंतर अजित पवारांनीही आपल्या आमदारांना मित्रपक्षांशी सांभाळून वागण्याच्या सूचना दिल्या आहेत. भाजप आणि राष्ट्रवादीत संघर्ष असलेल्या ठिकाणी कसं काम केलं पाहिजे, याबाबतही दादांनी मार्गदर्शन केलं आहे.‘सर्वच कार्यकर्त्यांना वाटते की, आपापला नेता हा मुख्यमंत्री व्हावा. पण सर्वांची इच्छा पूर्ण होते, असे होत नाही. मुख्यमंत्रिपदासाठी १४५चा मॅजिक आकडा पार करावा लागतो. दुसरी सर्वांत महत्त्वाची बाब म्हणजे कोणाला मतदान करायचे आहे, हे मतदार राजा याच्या हातात असते,’ अशी प्रतिक्रिया उपमुख्यमंत्री अजित पवार यांनी पुण्यात मंगळवारी व्यक्त केली.
Users Today : 17