- मुंबई: धारावीमध्ये ‘बेस्ट’च्या धावत्या बसमध्ये शिरून चोराने वाहकाकडून पैशाची बॅग हिसकावण्याचा प्रयत्न केल्याची धक्कादायक घटना घडली आहे. इतकंच नाही तर वाहकाने चोराचा प्रतिकार करताच चोराने त्याच्यावर चाकूने वार करत त्याला गंभीर जखमी केले आणि त्याचा मोबाइल घेऊन पसार झाला. याबाबतची माहिती मिळताच धारावी पोलिसांनी काही तासांतच आरोपी शाहबाज खानला अटक केली असून वाहक अशोक डगळे यांच्यावर रुग्णालयात उपचार करण्यात आले आहेत.
- धावत्या बसमध्ये शिरला अन् वाहकावर हल्ला
विक्रोळी आगार ते पायधुनी या मार्गावर चालणाऱ्या बेस्ट बस क्रमांक ७ ही बस गुरुवारी रात्री बेस्ट धारावी येथील पिवळा बंगला परिसरात आली. यावेळी शाहबाज हा बसमध्ये शिरला. प्रवासी असल्याचा समज झाल्याने वाहक अशोक डगळे हे बेसावध होते. शाहबाज याने बसमध्ये प्रवेश करताच डगळे यांच्याकडील पैशाची बॅग हिसकावण्यास सुरुवात केली.डगळे यांनी प्रतिकार केल्याने शाहबाजने चाकू काढला आणि चाकूने त्यांच्या मानेच्या खाली, खांद्यावर, मांडीवर आणि कमरेवर चाकूने वार केले. या हल्ल्यात डगळे गंभीर जखमी झाले, रक्तबंबाळ झाले. हे पाहून चोराने त्यांच्याकडील मोबाइल हिसकावला आणि तो मोबाईल घेऊन पसार झाला. त्यानंतर चालकाने याबाबतची माहिती पोलिसांना देत डगळे यांना रुग्णालयात दाखल केले.पोलिसांची तात्काळ कारवाई, आरोपीला अटक
या घटनेची माहिती मिळताच धारावी पोलिसांनी घटनास्थळी आणि शीव रुग्णालयात धाव घेतली. डगळे यांनी केलेल्या तक्रारीवरून पोलिसांनी हत्येच्या प्रयत्नाचा गुन्हा दाखल केला. वरिष्ठ निरीक्षक राजू बिडकर यांच्या मार्गदर्शनाखाली गुंडाविरोधी पथकाचे उपनिरीक्षक विकास शेलार यांच्यासह दत्तात्रय वरखडे, राजेश शिंगटे, बजरंग लांडगे, योगेश सोनार यांच्या पथकाने आरोपीचा शोध सुरू केला. या पथकाने तपास कौशल्य पणाला लावत हल्ला करणारा आरोपी शाहबाज खान असल्याची ओळख पटवली. धारावीतील कावळे परिसरात असल्याची माहिती मिळताच धारावी पोलिसांनी त्याला अटक करून त्याच्याकडून चोरीचा मोबाइल आणि चाकू हस्तगत केला.
Users Today : 17