नागपूर : भारतीय जनता पक्षाने शहरातील सहाही जागांवर दावा कायम ठेवल्याने शिवसेना (शिंदे गट) आणि राष्ट्रवादी काँग्रेसच्या (अजित पवार गट) इच्छुकांचा प्रश्न निकाली निघण्याची शक्यता आहे. ग्रामीणमध्ये कोणते मतदारसंघ त्यांच्यासाठी सोडले जातात, याची चिंता जिल्ह्यातील कार्यकर्त्यांना लागली आहे.
दरम्यान, लोकसभा निवडणुकीतील उणीव भरून काढण्यासाठी भाजपचे तब्बल ३२ हजार नेते, कार्यकर्ते आज, रविवारी महाजनसंपर्क अभियानाद्वारे घरोघरी भेट देणार आहेत. केंद्रीय मंत्री नितीन गडकरी, उपमुख्यमंत्री देवेंद्र फडणवीस व अन्य दिग्गज नेते सहभागी होतील. अभियानाच्या माध्यमातून केंद्र व राज्यातील प्रगतीपुस्तक लोकांपर्यंत पोहोचवण्याचे प्रयत्न असल्याची माहिती शहराध्यक्ष बंटी कुकडे यांनी शुक्रवारी एका पत्रकार परिषेदत दिली.लोकसभा निवडणुकीत पाठ फिरवणाऱ्या मतदारांनी मतदानांचा हक्क बजावावा, यावर विशेष भर राहील. नागरिकांच्या समस्या, अडचणींची माहिती घेऊन मतदारयादीत नाव आहे की नाही, याची खातरजमा केली जाईल, असेही बंटी कुकडे यांनी स्पष्ट केले.शहरात २ हजार १५८ बुथ आहेत. तितकेच बुथप्रमुख, ७३४ शक्ती केंद्रप्रमुख, विविध मोर्चा, आघाड्यांचे पदाधिकारी व कार्यकारिणी सदस्य, असे ३२ हजार पदाधिकारी व कार्यकर्ते घरोघरी भेट देतील. केंद्रीय मंत्री नितीन गडकरी पूर्व व मध्य नागपूरवर लक्ष केंद्रित करतील. दक्षिण-पश्चिममध्ये उपमुख्यमंत्री देवेंद्र फडणवीस आणि उत्तरमध्ये प्रदेशाध्यक्ष चंद्रशेखर बावनकुळे व प्रदेश उपाध्यक्ष ॲड. धर्मपाल मेश्राम यांच्या भिन्नभिन्न मतदारसंघात अन्य पदाधिकारी व कार्यकर्ते घरोघरी जाणार आहेत.सहाही मतदारसंघात मित्रपक्ष शिवसेना आणि राष्ट्रवादी काँग्रेस कमळाला सहकार्य करतील, असा विश्वास बंटी कुकडे यांनी व्यक्त केला. पत्रकार परिषदेस आमदार कृष्णा खोपडे, आमदार विकास कुंभारे, धर्मपाल मेश्राम, संजय बंगाले, चंदन गोस्वामी आदी उपस्थित होते.
१३ लाख मतदारांचा मोबाइल डेटा
लोकसभा निवडणुकीत भाजप तसेच, नितीन गडकरी यांनी ७५ टक्के मतदानाचे आवाहन केले होते. मात्र, मतदारयादीतील घोळामुळे अनेक भागांतील मतदारांची निराशा झाली. कुठे यादीत नाव नव्हते किंवा केंद्र बदलल्याने सुमारे दोन लाख मतदार वंचित राहिले. लोकसभा निवडणुकीदरम्यान १३ लाख मतदारांचा मोबाइल डेटा संकलित करण्यात आला, असे बंटी कुकडे यांनी सांगितले.
Users Today : 18