बा देवा महाराजा, पुन्हा एकदा…” — महापालिका निवडणुकीपूर्वी उद्धव ठाकरे भावुक; देवाकडे घातलं गाऱ्हाणं “सावध राहा, नाहीतर पुढील पाच वर्षांत आपण दिसणारही नाही!” — उद्धव ठाकरेंचा इशारा

मुंबई :
मुंबई महापालिका निवडणुका तोंडावर असताना, शिवसेना (ठाकरे गट) प्रमुख उद्धव ठाकरे यांनी मागाठाणे येथील मालवणी महोत्सवातून थेट निवडणुकीचे रणशिंग फुंकले.
२०१२ च्या आठवणींना उजाळा देत त्यांनी भावनिक भाषणात देवाकडे पुन्हा एकदा “शिवसेनेचा महापौर व्हावा” असे गाऱ्हाणं घातलं.

“२०१२ ला गाऱ्हाणं घातलं होतं, आणि महापौर झाला”

कार्यक्रमात बोलताना उद्धव ठाकरे म्हणाले —

“२०१२ ला इथेच मी देवाकडे गाऱ्हाणं घातलं होतं की, मुंबईचा महापौर होऊ दे… आणि त्यानंतर सुनील प्रभू महापौर झाले. पुढचं मी सांगत नाही, पण तसंच गाऱ्हाणं आताही आपल्या देवाला घातलेलं आहे.”

यावेळी ठाकरे यांच्या आवाजात भावनिक छटा जाणवत होती. उपस्थित कार्यकर्त्यांनी “शिवसेना जिंदाबाद”च्या घोषणांनी सभागृह दणाणून सोडलं.

“सावध राहा, नाहीतर पुढील पाच वर्षांत दिसणार नाहीत”

निवडणुकीच्या पार्श्वभूमीवर ठाकरे यांनी कार्यकर्त्यांना इशारा देत सावधगिरी बाळगण्याचं आवाहन केलं.

“मला विश्वास आहे की बाकी कोणी ऐकू न ऐको, पण देव आपलं ऐकतो. मी मनापासून बोलतोय, खोटं बोलायचं म्हणून बोलत नाही. आपला मोर्चा झाला. त्यामुळे सर्वांनी सावध राहिलं पाहिजे, नाहीतर मुंबईत जेवढे दिसतोय, तेवढे पण पुढील पाच वर्षांत दिसणार नाहीत…”

या विधानाने उपस्थितांमध्ये क्षणभर शांतता पसरली, मात्र त्यानंतर उत्साहाच्या घोषणा पुन्हा उमटल्या.

“तीच जिद्द आणि हिंमत वेतोबाने दिली आहे”

पुढे उद्धव ठाकरे म्हणाले —

“जुने कार्यकर्ते अजूनही लढत आहेत. संघर्ष म्हटला की मराठी माणूस मागे हटत नाही. अंगावर आलं तर शिंगावर घेतल्याशिवाय राहत नाही. तीच जिद्द आणि हिंमत आपल्याला वेतोबाने दिलेली आहे.”

त्यांनी जुन्या कार्यकर्त्यांचा उल्लेख करत संघर्ष आणि निष्ठा हाच शिवसेनेचा आत्मा असल्याचं सांगितलं.

मालवणी महोत्सवाला राजकीय रंग

मालवणी महोत्सवाचा उद्देश सांस्कृतिक असला तरी, उद्धव ठाकरे यांच्या उपस्थितीमुळे संपूर्ण कार्यक्रमाला राजकीय स्वरूप प्राप्त झालं.
कार्यक्रमस्थळी मोठ्या संख्येने शिवसैनिक जमले होते. कार्यकर्त्यांमध्ये महापालिका निवडणुकीची चर्चा आणि तयारीचा उत्साह स्पष्ट दिसून आला.

महापालिका निवडणुका लवकरच जाहीर होण्याची शक्यता

राज्यातील महापालिका निवडणुकांची घोषणा ४ किंवा ५ नोव्हेंबर रोजी होण्याची शक्यता वर्तवली जात आहे.
शिवसेना (ठाकरे गट) यांनी या सभेद्वारे निवडणुकीच्या प्रचाराची अनौपचारिक सुरुवात केल्याचं स्पष्ट संकेत मिळाले आहेत.