वॉशिंग्टन / नवी दिल्ली :
अमेरिकेचे माजी राष्ट्राध्यक्ष डोनाल्ड ट्रम्प यांनी पुन्हा एकदा त्यांच्या वादग्रस्त विधानामुळे जागतिक स्तरावर खळबळ उडवली आहे. त्यांनी पाकिस्तानच्या अणवस्त्र चाचणीसंबंधी असा एक मोठा खुलासा केला आहे, ज्यामुळे भारतासह अनेक देशांमध्ये चिंता वाढली आहे.
अमेरिकन वृत्तवाहिनी CBS News च्या “60 मिनिट” या लोकप्रिय कार्यक्रमात दिलेल्या मुलाखतीदरम्यान ट्रम्प म्हणाले —
“रशिया, चीन, उत्तर कोरिया आणि पाकिस्तान हे देश सध्या सक्रियपणे अणवस्त्र चाचण्या करत आहेत. त्यामुळे अमेरिकेलाही पुन्हा अणवस्त्र परीक्षण सुरू करावं लागेल.”
या एका वक्तव्यामुळे जागतिक राजकारणात खळबळ माजली आहे. कारण पाकिस्तानच्या अणवस्त्र कार्यक्रमाविषयी जगाला मर्यादित माहिती होती. ट्रम्प यांच्या या विधानाने त्या देशाच्या गुप्त चाचण्यांवर पडदा उचलल्यासारखे झाले आहे.
ट्रम्प म्हणाले — “आम्ही मागे राहू शकत नाही”
ट्रम्प पुढे म्हणाले —
“रशिया आणि चीन सतत चाचण्या करत आहेत, पण ते या गोष्टी उघडपणे मान्य करत नाहीत. आपण ओपन सोसायटी आहोत, त्यामुळे आपण या गोष्टी पारदर्शकपणे सांगतो. आता अमेरिका देखील अणवस्त्र चाचण्या सुरू करणार आहे. उत्तर कोरिया सतत टेस्ट करत आहे, आणि पाकिस्तानही टेस्ट करतोय.”
या विधानाने केवळ अमेरिकेतच नव्हे तर संपूर्ण जगात तणावाचे वातावरण निर्माण झाले आहे.
अमेरिका पुन्हा अणवस्त्र चाचणीस सज्ज
रशियाने नुकत्याच नवीन अणवस्त्र परीक्षणाची घोषणा केल्यानंतर, ट्रम्प यांनी अमेरिका देखील “पूर्ण तयारीत” असल्याचे सांगितले.
“आपल्याकडे जगातील सर्वाधिक अणवस्त्रांचा साठा आहे. आमच्याकडे इतकी अणवस्त्र आहेत की आम्ही जगाला १५० वेळा नष्ट करू शकतो,” असे ट्रम्प म्हणाले.
त्यांनी सांगितले की रशियाचे राष्ट्राध्यक्ष व्लादिमीर पुतिन आणि चीनचे राष्ट्राध्यक्ष शी जिनपिंग यांच्यासोबत त्यांनी अणवस्त्र निशस्त्रीकरणाबाबत चर्चा केली आहे. मात्र, अणवस्त्र परीक्षणाच्या वेळेबाबत किंवा ठिकाणाबाबत त्यांनी कोणतीही माहिती दिली नाही.
पाकिस्तानबद्दल भारताची चिंता वाढली
ट्रम्प यांच्या या विधानानंतर भारतात चिंता व्यक्त होत आहे. कारण पाकिस्तानकडे अणवस्त्र तंत्रज्ञान असून, त्याची चाचणी चालू असल्याचे त्यांनी स्पष्टपणे नमूद केले. पाकिस्तानकडून अणुचाचणी होत असल्याचे अमेरिकेच्या माजी राष्ट्राध्यक्षांच्या तोंडून आलेले हे विधान भारताच्या सुरक्षा दृष्टिकोनातून गंभीर मानले जात आहे.
भारत शांततेचा पुरस्कर्ता देश असून, अणवस्त्रांचा वापर फक्त बचावात्मक उद्देशाने करण्याची त्याची धोरणात्मक भूमिका आहे. परंतु पाकिस्तानच्या गुप्त हालचालींनी दक्षिण आशियात पुन्हा तणाव निर्माण होण्याची भीती तज्ज्ञांनी व्यक्त केली आहे.
जागतिक तणावाचा नवा टप्पा
रशिया, चीन, उत्तर कोरिया आणि आता पाकिस्तान अशा देशांकडून अणवस्त्र चाचण्या सुरू असल्याचा दावा ट्रम्प यांनी केला आहे. त्यामुळे जग पुन्हा एका “नव्या अणुशर्यतीच्या” उंबरठ्यावर उभं आहे, असं म्हणावं लागेल.
Users Today : 18