बुलढाण्यात छत्रपती शिवाजी महाराजांची ३९६ वी जयंती उत्साहात साजरी

बुलढाणा प्रतिनिधी :
स्वराज्य संस्थापक जाणता राजा छत्रपती शिवाजी महाराज यांच्या ३९६ व्या जयंतीनिमित्त बुलढाणा शहरात विविध सामाजिक, शैक्षणिक व सांस्कृतिक कार्यक्रमांचे आयोजन करण्यात आले. १९ फेब्रुवारी २०२५ रोजी विविध संघटना व बहुउद्देशीय संस्थांच्या वतीने मोठ्या उत्साहात आणि जल्लोषात ही जयंती साजरी करण्यात आली.
सकाळी शिवरायांच्या प्रतिमेस पुष्पहार अर्पण करून अभिवादन करण्यात आले. त्यानंतर शहरातून भव्य मिरवणूक काढण्यात आली. ढोल-ताशांच्या गजरात, लेझीम पथकांच्या सादरीकरणात आणि भगव्या ध्वजांच्या दिमाखात वातावरण शिवमय झाले होते. युवक-युवती, महिला तसेच लहान मुलांचा उत्स्फूर्त सहभाग यावेळी पाहायला मिळाला.
शाळा-महाविद्यालयांमध्ये शिवचरित्रावर व्याख्याने, निबंध स्पर्धा, वक्तृत्व स्पर्धा व सांस्कृतिक कार्यक्रमांचे आयोजन करण्यात आले. अनेक ठिकाणी रक्तदान शिबिर व सामाजिक उपक्रम राबविण्यात आले.
शिवरायांच्या पराक्रम, शौर्य, दूरदृष्टी आणि स्वराज्य स्थापनेच्या कार्याची आठवण करून देत उपस्थित मान्यवरांनी तरुणांनी शिवरायांच्या विचारांचा आदर्श घ्यावा, असे आवाहन केले.
शिवजयंतीनिमित्त संपूर्ण शहरात भगवामय वातावरण निर्माण झाले होते. जय शिवरायच्या घोषणांनी बुलढाणा नगरी दुमदुमली. 🚩