योगासन स्पोर्ट्स असोसिएशनतर्फे सूर्यनमस्कार अभियान

बुलढाणा प्रतिनिधी :
Yogasana Bharat ही योगासन या क्रीडा प्रकाराचा भारतात व परदेशात प्रचार-प्रसार करणारी, युवा व क्रीडा मंत्रालय मान्यताप्राप्त संघटना आहे. रथसप्तमी ते छत्रपती शिवाजी महाराज जयंती या कालावधीत संपूर्ण देशभर सूर्यनमस्कार अभियान व योगासन प्रात्यक्षिकांचा उपक्रम राबविण्यात आला.
या अंतर्गत बुलढाणा योगासन स्पोर्ट्स असोसिएशनच्या वतीने जिल्हाभर विविध शाळा-महाविद्यालयांमध्ये कार्यक्रम घेण्यात आले.
सहभागी संस्था व विद्यार्थी संख्या
महात्मा फुले शाळा – सुमारे २०० विद्यार्थी
शारदा ज्ञानपीठ – ३५० विद्यार्थी
यशवंत अध्यापक महाविद्यालय – ७५ विद्यार्थी
विद्यार्थ्यांना योगासन हा सर्वांगीण विकास करणारा क्रीडा प्रकार कसा आहे, त्याचे नियम व स्पर्धात्मक स्वरूप याबाबत मार्गदर्शन करण्यात आले. तसेच सूर्यनमस्काराचे आरोग्यदायी फायदे समजावून सांगण्यात आले.
मार्गदर्शन व प्रात्यक्षिके
जिल्हा सचिव व योग प्रशिक्षक डॉ. वैशाली गजेंद्र निकम यांनी प्रशिक्षक म्हणून मार्गदर्शन केले. समर्थ भुसारी, क्षितिज निकम, शलाका पवार, मुग्धा कांगले, संयुजा हिंगे, शर्वरी देशमुख, वरदा देशपांडे या खेळाडूंनी विविध योगासनांचे सादरीकरण केले.
या उपक्रमासाठी बुलढाणा जिल्हा योगासन स्पोर्ट्स असोसिएशनचे अध्यक्ष डॉ. पी. आर. उपर्वट, महाराष्ट्र योगासन स्पोर्ट्स असोसिएशनचे अध्यक्ष संजय मालपाणी, सचिव राजेश पवार व टेक्निकल डायरेक्टर सतीश मोहोगावकर यांचे मार्गदर्शन लाभले.
या अभियानामुळे विद्यार्थ्यांमध्ये आरोग्य, शिस्त व क्रीडाभावना यांविषयी जागरूकता निर्माण झाली.