हिंगोली
हिंगोली जिल्ह्यातील औंढा नागनाथ तालुक्यातील जवळा बाजार परिसरात अत्यंत हृदयद्रावक घटना घडली असून, डिझेल उपलब्ध नसल्याचे कारण देत गरोदर महिलेला रुग्णवाहिका नाकारण्यात आल्याचा आरोप करण्यात आला आहे. वेळेत रुग्णालयात पोहोचता न आल्याने महिलेच्या गर्भातील बाळाचा मृत्यू झाल्याची माहिती समोर आली आहे.
मिळालेल्या माहितीनुसार, संबंधित गरोदर महिलेला तातडीने हिंगोली येथील शासकीय रुग्णालयात हलवण्याची गरज होती. मात्र प्राथमिक आरोग्य केंद्राकडून रुग्णवाहिकेसाठी डिझेल उपलब्ध नसल्याचे सांगण्यात आल्याने मदत मिळू शकली नाही. परिणामी नातेवाईकांनी खासगी वाहनाद्वारे महिलेला रुग्णालयात हलवले.
रुग्णालयात दाखल केल्यानंतर तपासणीत बाळाचा गर्भातच मृत्यू झाल्याचे डॉक्टरांनी सांगितल्याचा दावा नातेवाईकांनी केला आहे. “जर वेळेत उपचार मिळाले असते तर बाळ वाचले असते,” अशी प्रतिक्रिया नातेवाईकांनी व्यक्त केली आहे.
या घटनेनंतर परिसरात संतापाची लाट उसळली असून संबंधित यंत्रणेवर गंभीर आरोप होत आहेत. नातेवाईकांनी या प्रकरणाची तक्रार दाखल केली असून सखोल चौकशीची मागणी केली आहे.
दरम्यान, या घटनेवरून राजकीय प्रतिक्रिया उमटू लागल्या आहेत. विरोधकांनी सरकारवर टीका करत आरोग्य व्यवस्थेतील ढिसाळपणावर प्रश्नचिन्ह उपस्थित केले आहे. या प्रकरणाची जबाबदारी निश्चित करून कठोर कारवाईची मागणी केली जात आहे.