जिल्हाधिकारी कार्यालयात मुख्यमंत्री सचिवालय कक्षाची स्थापना; नागरिकांना अर्ज व निवेदने स्थानिक स्तरावर देता येणार

प्रविण चव्हाण (जिल्हा प्रतिनिधी )

नंदुरबार,दि.10 फेब्रुवारी:

जिल्ह्यातील सर्वसामान्य जनतेचे दैनंदिन प्रश्न, शासनस्तरावर असलेली कामे, त्यासंदर्भात प्राप्त होणारे अर्ज, निवेदने, संदर्भ यामध्ये अधिक लोकाभिमुखता, पारदर्शकता व गतिमानता येण्यासाठी जिल्हाधिकारी कार्यालयात 20 डिसेंबर,2022 पासून जिल्हास्तरीय मुख्यमंत्री सचिवालय कक्ष स्थापन करण्यात आला असून नागरिकांना आपली निवेदने व अर्ज थेट या कक्षात देता येणार असल्याची माहिती मुख्यमंत्री सचिवालय कक्षाचे पदसिद्ध विशेष कार्य अधिकारी तथा निवासी उपजिल्हाधिकारी सुधीर खांदे यांनी एका प्रसिद्धी पत्रकान्वये दिली आहे.

जिल्हाधिकारी कार्यालयात मुख्यमंत्री सचिवालय कक्ष स्थापन करण्याच्या सूचना राज्याचे मुख्य सचिवांनी दिल्या आहेत. त्यानुसार जिल्हाधिकारी कार्यालय, नंदुरबार येथे गृह शाखेच्या कक्षात जिल्हास्तरीय मुख्यमंत्री सचिवालय कक्ष स्थापन करण्यात आला आहे. या कक्षासाठी पदसिद्ध विशेष कार्य अधिकारी, मुख्यमंत्री सचिवालय कक्ष म्हणून सुधीर खांदे, नायब तहसिलदार (महसूल ) राजेंद्र चौधरी, महसूल सहायक सुरेश अहिरे यांची नियुक्ती करण्यात आली आहे.

या कक्षात सर्वसामान्य जनतेकडून मुख्यमंत्र्यांना उद्देशून लिहिलेले दैनंदिन अर्ज, निवेदने, संदर्भ इत्यादी स्विकारण्यात येवून त्याची पोचपावती संबंधित अर्जदारास देण्यात येईल. ज्या प्रकरणात जिल्हास्तरावरुनच कार्यवाही होणे अपेक्षित आहे. अशा प्रकरणांचा निपटारा जिल्हास्तरावरच करण्यात येणार आहे. मुख्यमंत्री कक्षामध्ये शासकीय, निमशासकीय अधिकारी, कर्मचाऱ्यांच्या आस्थापनाविषयक बाबींवरील तसेच अर्धन्यायिक स्वरुपाची अपेक्षित असलेले अर्ज, निवेदने दाखल करणे अभिप्रत नाही. कक्षात प्राप्त झालेल्या अर्ज, निवेदनांवर संबंधित विभागाचा आढावा हा प्रत्येक महिन्याच्या लोकशाही दिना नंतर घेण्यात येणार आहे.