राष्ट्रवादीच्या दोन्ही गटांचं ‘एकमत’, पाच राज्यांच्या विधानसभा निवडणुकांबाबत मोठा निर्णय

 लोकसभेची सेमी फायनल मानल्या जाणाऱ्या पाच राज्यांतील विधानसभा निवडणुका पुढच्या महिन्यात पार पडणार आहेत. यासाठी भाजपप्रणित एनडीए आणि ‘इंडिया’ या दोन्ही आघाड्यांनी कंबर कसली आहे. राष्ट्रवादी फुटून त्यातील अजितदादांचा गट एनडीएसोबत आहे, तर शरद पवारांचा गट इंडिया आघाडीसोबत. परंतु या दोन्ही गटांनी आगामी पाच राज्यांतील विधानसभा निवडणुका न लढवण्याचा निर्णय घेतला आहे. इतर अनेक गोष्टींवर मतभेद होत असताना राष्ट्रवादीच्या दोन्ही गटांचं याबाबतीत मात्र न ठरवता एकमत झाल्याचं चित्र आहे.राष्ट्रवादी पक्ष नेमका कुणाचा, अधिकृत निवडणूक चिन्ह कोणाचं, हा वाद सुरु असताना राष्ट्रवादीच्या दोन्ही गटांनी लोकसभेची लिटमस टेस्ट मानल्या जाणााऱ्या पाच राज्यांतील विधानसभा निवडणुकांना सामोरं न जाण्याचा निर्णय घेतला आहे. नोव्हेंबर महिन्यात मध्य प्रदेश, राजस्थान, छत्तीसगड, तेलंगणा आणि मिझोरम या पाच राज्यात निवडणुका होत आहेत. मध्य प्रदेशात भाजप, तर काँग्रेस राजस्थान आणि छत्तीसगडमध्ये सत्तेत आहे. या पाच राज्यांमध्ये राष्ट्रवादीची फारशी ताकद नाही.