पुणे (धायरी) : सिंहगड रस्त्यावरील उड्डाणपुलाचे काम युद्धपातळीवर सुरू असून, सध्या या कामामुळे रांका ज्वेलर्स ते ब्रम्हा हॉटेलपर्यंत रस्ता रुंद झाला आहे. यामुळे वाहतूक कोंडी कमी झाली आहे. सध्या या रस्त्यावरील राजाराम पूल चौकात उड्डाणपुलाचे काम सुरू करण्यात आल्यामुळे चौकातील वाहतुकीत बदल करण्यात आला आहे. पुढील तीन महिने हा बदल राहणार असल्याचे महापालिका प्रशासनाकडून सांगण्यात आले आहे.
– महापालिकेकडून राजाराम पूल ते ‘फन टाइम’पर्यंत दोन उड्डाणपूल उभारले जाणार आहेत.
– स्वारगेटकडून धायरीकडे जाताना विठ्ठल मंदिर कमान ते ‘फन टाइम’पर्यंत दुहेरी पूल आहे.
– धायरीकडून स्वारगेटकडे येताना राजाराम पूल चौकात स्वारगेटकडे जाण्याच्या मार्गावर एका बाजूला पूल आहे. यातील स्वारगेटकडे जाणाऱ्या पुलाचे काम वेगाने सुरू आहे.
– पुलाचे गईर टाकण्यात येणार असल्याने मुख्य चौक वाहतुकीस बंद करण्यात आला आहे.- सिंहगड रस्त्यावर चौकापासून दोन्ही बाजूस पुढे १०० मीटर अंतरावर वाहनांसाठी रस्ता देण्यात आला आहे.असा असेल पर्यायी रस्ता
– कर्वेनगरकडून राजाराम पुलावरून आलेल्या वाहनांनी धायरीच्या दिशेने जाण्यासाठी स्वारगेटच्या दिशेने येऊन शारदा मठासमोरील बाजूने उपलब्ध करून देण्यात आलेल्या वळणावरून धायरीकडे जावे.
– स्वारगेटकडून कर्वेननगरकडे जाणाऱ्या वाहनांनी राजाराम पूल चौकातून पुढे १०० मीटर जाऊन महापालिकेच्या सांडपाणी शुद्धीकरण केंद्राच्या समोरील बाजूस दिलेल्या पर्यायी वळणावरून पुन्हा राजारामपुलाकडे जावे.
पोल हटविण्याबाबत महापालिकेला पत्र
राजाराम चौकात वाहतुकीत बदल करण्यात आल्यामुळे राजाराम पुलावरून स्वारगेटकडे जाताना अरुंद रस्त्यामुळे वाहतूक कोंडी निर्माण होत आहे. यासाठी सिंहगड रस्ता वाहतूक शाखेकडून दोन अंमलदार आणि चार वॉर्डन नेमण्यात आले आहेत; तसेच वाहतूक शाखेकडून या चौकातील पादचारी मार्ग आणि विद्युत पोल हटवून रस्ते रुंद करावेत, अशा मागणीचे पत्र महापालिकेला देण्यात आले आहे.
फोटो ओळ – सिंहगड रस्त्यावरील उड्डाणपुलाचे काम युद्धपातळीवर सुरू असून, सध्या राजाराम पूल चौकात उड्डाणपुलाचे काम सुरू करण्यात आले आहे. यामुळे चौकातील वाहतुकीत बदल करण्यात आला असून, मुख्य चौकातील रस्ता वळण्यासाठी बंद करण्यात आला आहे.
Users Today : 14