पुण्याची मेट्रो तातडीने झाली पाहिजे; अजित पवारांचे सूचना, ससून ड्रग्ज प्रकरणातील दोषींवरही केलं वक्तव्य

प्रवाशांना चांगली सेवा मिळावी आणि त्यांचा वेळ वाचावा या यासाठी पुण्यातील सर्व मेट्रो तातडीने झाली पाहिजे. त्यासाठी राज्य सरकारच्या वतीने दिला जाणारा हिस्सा आणि केंद्र सरकारचा हिस्सा मिळवून देण्याचे काम केले जाईल, असे आश्वासन राज्याचे उपमुख्यमंत्री आणि पालकमंत्री अजित पवार यांनी शनिवारी दिले.पुण्याचे पालकमंत्री पद स्वीकारल्यानंतर अजित पवार यांनी शनिवारी सायंकाळी पुणे मेट्रोच्या सिव्हील कोर्ट स्टेशनची पाहणी केली. यावेळी त्यांनी मेट्रोच्या अधिकाऱ्यांकडून सध्याच्या कामाच्या प्रगतीचा आढावा घेतला. प्रवाशांच्या सोईसाठी सूचना फलक, दिशादर्शक फलक लावा. मेट्रो भवनाचे काम, दिवाणी न्यायालय ते स्वारगेट भुमीगत मेट्रोचे काम आणि रुबी हॉल ते रामवाडीचे काम लवकर करण्याच्या सूचना पवार यांनी अधिकाऱ्यांना दिल्या. त्यानंतर पत्रकारांसोबत बोलताना त्यांनी ही माहिती दिली.
पवार म्हणाले की, पुणे मेट्रो सुरू करताना कामगार पुतळा, राजीव गांधी वसाहत येथील जागेच्या प्रश्नावेळी खासदार, आमदार, नगरसेवक यांनी मोलाची मदत केली. यावेळी अधिकाऱ्यांनी खूप कष्ट केले. जागा मोकळी करून दिल्यानंतर या ठिकाणी मेट्रो स्टेशन झाले आहे. या स्टेशनची पाहणी करण्याची विनंती अधिकाऱ्यांनी केली होती. त्यानुसार आज मेट्रो स्टेशनची पाहणी केली. पुढील मार्ग सुरू करण्यासंदर्भात अधिकाऱ्यांची चर्चा केल्याचे सांगितले.ससूनमधील ड्रग्ज प्रकरणात राज्याचे उपमुख्यमंत्री आणि गृहमंत्री यांनी दोषींवर कडक कारवाई केली जाईल, असे आश्वासन दिले आहे. मग ते ससूनमधील अधिकारी असोत की पोलीस अधिकारी आणि कर्मचारी त्यांची गय केली जाणार नाही. त्याबाबत चौकशी देखील सुरू असून काही जणांवर कारवाई करण्यात आली आहे. गोष्टी चुकीच्या घडल्या आहेत. असल्या लोकांची गर केली जाणार नाही हीच आमची भूमिका आहे. तरुण पिढीला बरबाद करण्याचे काम ड्रग्ज माफिया करत आहे. अशा लोकांना फाशीचीच शिक्षा दिली गेली पाहिजे, असे माझे वैयक्तिक मत आहे. त्यासाठी कायद्यामध्ये बदल करावा लागणार आहे, असे अजित पवार यांनी सांगितले.