सातारा : लेकीचं लग्न ही कुटुंबासाठी आणि तिच्या वडिलांसाठी खूप महत्त्वाची गोष्ट असते. सातारा शहराजवळील गोडोलीमधील राजेवाडीतील विजय खामकर हे रिक्षा चालवतात. खामकर यांनी त्यांच्या कुटुंबाचा उदरनिर्वाह रिक्षा चालवून पार पाडला. त्यांची लेक सायली खामकर हिचा विवाह सांगवड (ता. पाटण) येथील शुभम पाटील यांच्याशी झाला. हा विवाहसोहळा एका गोष्टीमुळं चर्चेत राहणारा ठरला. कारण या लग्नासाठी जमलेले वऱ्हाडी चक्क रिक्षातून विवाहस्थळी दाखल झाले.
सातारकर सजवलेल्या रिक्षा पाहून काही काळासाठी अचंबित
साताऱ्यात एकाच वेळी इतक्या मोठ्या संख्येने सजविलेल्या रिक्षांचा ताफा बघून ये- जा करणारेही बुचकळ्यात पडले. यामागची पार्श्वभूमी समजताच साऱ्यांनीच सायलीचे, तिच्या वडिलांचे तसेच आई नीता, भाऊ हर्षद, शुभम आदींचे कौतुक केले. या निमित्ताने कुटुंबीय, नातेवाईक यांच्या दृष्टीनेही हा विवाह सोहळाही अनोखा ठरला. सायली खामकरचे शिक्षण पदवीपर्यंत झाले आहे. आपण दुसऱ्या कोणत्याही गाडीने न जाता स्वतःचा वडिलांच्या रिक्षामधून जावं हा क्षण सर्वांसाठी आनंदाचा आणि गर्वाचा होता.सायलीचे वडील विजय खामकर म्हणाले की,मुलांना आईवडिलांच्या कष्टाची जाणीव असणे, यातच त्यांच्या कष्टाचे चीज दडलं आहे. सायलीचं शिक्षण पदवीपर्यंत झाले. तिच्यावर केलेल्या संस्काराचा हा परिपाठ असल्याचं तिने दाखवून दिले. आम्हाला तिचा अभिमान वाटतो, असं ते म्हणाले.
Users Today : 4