येरवडा : देशातील पहिले महिला खुले कारागृह १३ वर्षांनंतर प्रत्यक्षात साकारणार आहे. राज्य सरकारने महिला खुल्या कारागृहासाठी ११ कोटी रुपयांचा निधी मंजूर केला असून, कारागृहाची क्षमता १०० असणार आहे. नवीन कारागृह सार्वजानिक बांधकाम विभागाकडून बांधून न घेता पोलिस गृहनिर्माण व कल्याण महामंडळाकडून बांधले जाणार आहे.
२०१० मध्ये भूमिपूजन
१७ एकर जागेत बांधणार
अखेर १३ वर्षांनंतर राज्य सरकारने देशातील पहिले महिला खुले कारागृह साकारण्यासाठी पावले उचलली आहेत. कारागृह उभारण्यासाठी सरकारने १० कोटी ९६ लाख रुपयांचा निधी मंजूर केला आहे. त्यामुळे देशातील पहिले महिला खुले कारागृह निर्माण होण्याचा मार्ग मोकळा झाला आहे. १७ एकर जागेत खुले कारागृह बांधले जाणार असून, येथे १०० महिला कैदी ठेवण्याची क्षमता आहे. याशिवाय स्वतंत्र प्रशासकीय इमारत, कैद्यांसाठी बराकीची सुविधा असणार आहे.शिक्षेत मिळणार सूट…
जन्मठेपेची शिक्षा झालेले आणि चांगली वर्तणूक असणाऱ्या कैद्यांना खुल्या कारागृहात पाठवले जाते. खुल्या कारागृहात शिक्षा भोगणाऱ्या कैद्यांना एकास एक दिवस माफी मिळते. त्यामुळे शिक्षेचा कालावधी घटून निम्मा होतो; पण महिला कैद्यांसाठी खुले कारागृह अस्तिवात नसल्याने त्यांना ‘एकास एक दिवस माफी’चा लाभ मिळत नव्हता; पण आता उशिरा का होईना; खुले कारागृह उभारण्यासाठी निधी मंजूर झाल्याने १३ वर्षांनंतर कारागृह प्रत्यक्षात साकारणार आहे. त्यामुळे अनेक वर्षांपासून शिक्षा भोगणाऱ्या महिला कैद्यांना शिक्षेत सूट मिळू शकेल.
शेती करता येणार
खुले कारागृह निर्माण करताना महिला कैद्यांना काम मिळावे, यासाठी त्यांना शेती करता येणार आहे. जन्मठेपेची शिक्षा भोगणाऱ्या काही महिला कैद्यांसोबत त्यांची लहान मुले असतात. त्यामुळे खुल्या कारागृहात शिक्षा भोगणाऱ्या महिलांच्या मुलांचा विचार करून विविध उपाययोजना केल्या जाणार आहेत.
देशातील पहिले महिला खुले कारागृह येरवडा येथे उभारण्यासाठी राज्य सरकारने ११ कोटी रुपयांचा निधी मंजूर केला आहे. त्यामुळे अनेक वर्षांपासून प्रलंबित असलेला महिला खुल्या कारागृहाचा प्रश्न मार्गी लागणार आहे. खुल्या कारागृहात शंभर महिला कैद्यांना सामावून घेण्याची क्षमता असेल. – सुनील ढमाळ, अधीक्षक, येरवडा मध्यवर्ती कारागृह
Users Today : 9