छत्रपती संभाजीनगर : मतदान केंद्र कुठे, मतदार यादीत नाव आले का, यासह अन्य माहिती मिळविण्यासाठी जिल्हाधिकारी कार्यालयात सुरू करण्यात आलेल्या मतदार मदत व तक्रार निवारण कक्षाकडे आतापर्यंत २ हजार ३३५ हून अधिक जणांनी संपर्क साधला आहे. दरम्यान, निवडणूक आयोगाच्या विविध ॲपद्वारेही मतदारांना विविध प्रकारची माहिती मिळण्याची सुविधा उपलब्ध करुन देण्यात आली आहे तसेच जिल्हास्तरावर तसेच प्रत्येक सहाय्यक निवडणूक निर्णय अधिकारीस्तरावर १९५० हा टोल फ्री क्रमांकही कार्यान्वयीत करण्यात आला आहे.
लोकसभा निवडणुकीसाठी येत्या १३ मे रोजी मतदान होणार आहे. यंदा निवडणूक रिंगणात ३७ उमेदवार असल्याने रंगत वाढली आहे. एकीकडे प्रचाराची रणधुमाळी जोमाने सुरू असतानाच दुसरीकडे मतदान प्रक्रियेसाठी प्रशासनही सज्ज झाले आहे. यात मतदान केंद्र कुठ आहे, यासह मतदारांना निवडणूक संबंधित अन्य स्वरुपाची मदत व्हावी, यासाठी जिल्हाधिकारी कार्यालय परिसरात मतदार मदत व तक्रार निवारण कक्षही आचारसंहिता लागू होताच कार्यान्वीत करण्यात आला आहे.
मतदारांना संपर्क साधण्यासाठी खास १९५० हा टोल फ्री क्रमांक देखील कार्यान्वीत करण्यात आलेला आहे. यावर आतापर्यंत २ हजार ३३५ मतदारांनी संपर्क साधल्याची माहिती कक्ष प्रमुख प्रकाश पाटील यांनी दिली. मतदान केंद्र कुठे, मतदार यादीत नाव आहे का यासह अन्य स्वरुपाच्या माहितीसाठी, चौकशीसाठी मतदारांनी प्रामुख्याने संपर्क केला असून त्यांना याबाबत माहिती देत मार्गदर्शन करण्यात आल्याचेही त्यांनी नमूद केले. तर काही मतदारांनी प्रत्यक्ष या कक्षाला भेट देत आवश्यक ती माहिती प्राप्त केल्याचेही त्यांनी सांगितले.
Users Today : 54