नाशिक : राष्ट्रीय कुटुंब आरोग्य सर्वेक्षणानुसार नाशिक जिल्हा बालविवाहाच्या घटनांत अकराव्या क्रमांकावर असल्याचे समोर आले होते. बालविवाहांना प्रतिबंध करण्यासाठी जिल्हास्तरावर बालविवाह निर्मूलन जिल्हा कृतिदल स्थापन करण्यात आले आहे. या माध्यमातून विविध उपक्रम राबविले जात असून, बालविवाहमुक्त नाशिक जिल्हा करण्यासाठी जिल्हा प्रशासन कार्यरत आहे. महिला आणि बालविकास विभाग, चाइल्डलाइनसह आता संरक्षण समितीही बालविवाह रोखण्यासाठी प्रयत्न करणार असल्याचे सांगितले जात आहे.
बालविवाहासह बालकांवरील अत्याचार आणि अनिष्ट प्रथा नष्ट व्हाव्यात यासाठी ग्रामस्तरावर ग्राम बाल संरक्षण समितीची स्थापना करण्यात आली आहे. गावचे सरपंच हे या संरक्षण समितीचे अध्यक्ष असून, अंगणवाडी सेविका सदस्य सचिव आहेत. आशा सेविका, पोलिस पाटील, शाळेचे मुख्याध्यापक, शाळा व्यवस्थापन समिती अध्यक्ष, महिला बचत गट प्रतिनिधी, बालमित्र (१२ ते १८ वर्षे वयोगटातील एक विद्यार्थी आणि विद्यार्थिनी) यांचा समावेश आहे. ग्राम बालसंरक्षण समितीच्या दरमहा नियमित बैठका होणे अपेक्षित आहे. मात्र, गेल्या काही वर्षांत बालविवाह निर्मूलन करण्याच्या दृष्टीने समितीकडून क्वचित कार्यवाही झाली आहे. याच पार्श्वभूमीवर जिल्हाधिकारी जलज शर्मा यांनी समित्यांना बालविवाह निर्मूलनासाठी नियमित बैठका घेण्याच्या सूचना केल्या आहेत.
ज्या ठिकाणी बालविवाह होण्याची शक्यता आहे, अशा कुटुंबांना ग्रामपंचायतीत बोलावून किंवा त्यांच्या घरी भेट देऊन कुटुंबाचे समुपदेश करावे. समुपदेशनानंतरही समितीचे म्हणणे ऐकून न घेतल्यास ग्राम बालसंरक्षण समितीच्या अध्यक्षांनी, समितीच्या सदस्यांनी किंवा इतर नागरिकांनी तत्काळ जवळच्या पोलिस स्टेशनमध्ये किंवा चाइल्डलाइन हेल्पलाइन क्रमांक १०९८ किंवा ११२ या क्रमांकावर माहिती द्यावी, असेही जिल्हाधिकाऱ्यांनी कळविले आहे.
Users Today : 11