दे. राजा प्रतिनिधी :
देऊळगाव राजा येथील जुना जालना रोड परिसरात असलेल्या क्रांतीज्योती सावित्रीबाई ज्योतिराव फुले नगरपरिषद प्राथमिक शाळा क्रमांक १ मध्ये शिक्षण घेणाऱ्या इयत्ता पहिली ते चौथीतील विद्यार्थ्यांना सध्या गंभीर अडचणींचा सामना करावा लागत आहे.
१८९१ साली स्थापन झालेल्या या ऐतिहासिक शाळेची इमारत जीर्ण झाल्यानंतर विद्यार्थ्यांना तात्पुरत्या स्वरूपात टीनपत्र्याच्या शेडमध्ये स्थलांतरित करण्यात आले. गेल्या पाच ते सहा वर्षांपासून नवीन इमारतीचे काम सुरू असले तरी ते अद्याप अर्धवटच असल्याची माहिती समोर येत आहे.
वीजपुरवठा खंडित, पाण्याची समस्या
मागील दोन-तीन दिवसांपासून शाळेचा वीजपुरवठा खंडित करण्यात आल्याने परिस्थिती अधिकच बिकट झाली आहे.
लाईट नसल्यामुळे पिण्याच्या पाण्याची व्यवस्था ठप्प
पंखे बंद असल्याने वर्गखोल्यांत प्रचंड उकाडा
टीनशेडमध्ये बसलेल्या लहान मुलांना दम घुटल्यासारखी अवस्था
पालकांनी सांगितले की, वाढत्या उन्हाच्या तडाख्यात लहान विद्यार्थ्यांच्या आरोग्यावर विपरीत परिणाम होण्याची भीती निर्माण झाली आहे.
प्रशासनाचा निष्क्रियपणा?
काही पालकांनी नगरपरिषद शिक्षण विभागातील अधिकाऱ्यांकडे तोंडी तक्रार नोंदवली. मात्र अद्याप कोणतीही ठोस कारवाई झालेली नसल्याचा आरोप करण्यात येत आहे. संबंधित मुख्याध्यापकांनीही वीजपुरवठा सुरळीत करण्यासाठी प्रभावी पावले उचलली नसल्याची नाराजी व्यक्त होत आहे.
“लहान मुलांच्या आरोग्याशी खेळणे योग्य आहे का?” असा सवाल पालकांकडून उपस्थित केला जात आहे. एखाद्या विद्यार्थ्याच्या प्रकृतीवर विपरीत परिणाम झाल्यास जबाबदार कोण, असा प्रश्नही नागरिक विचारत आहेत.
तातडीच्या उपाययोजनांची मागणी
नगराध्यक्ष, शिक्षणाधिकारी व नगरपरिषद प्रशासनाने तातडीने हस्तक्षेप करून
वीजपुरवठा सुरू करावा
पिण्याच्या पाण्याची व्यवस्था करावी
मूलभूत सुविधा उपलब्ध करून द्याव्यात
नवीन इमारतीचे काम लवकर पूर्ण करावे
अशी मागणी पालकांकडून होत आहे.
चिमुकल्या विद्यार्थ्यांच्या सुरक्षिततेचा प्रश्न ऐरणीवर असताना प्रशासन कोणती भूमिका घेणार आणि संबंधित अधिकाऱ्यांवर काही कारवाई होणार का, याकडे संपूर्ण देऊळगाव राजाचे लक्ष लागले आहे.
Users Today : 27