खाकी’चा उरला नाही धाक; चौकशीसाठी गेलेल्या पोलिसाच्या हाताचा आरोपीने घेतला चावा, काय प्रकरण?

 छत्रपती संभाजीनगर : अंमली पदार्थाची बेकायदा विक्री करण्याच्या प्रकरणात चौकशीसाठी गेलेल्या पोलिस पथकाच्या कामात चार आरोपींनी अडथळा निर्माण केला. त्यांनी पथकाला धक्काबुक्की केली. एवढेच नव्हे तर, पोलिस कर्मचाऱ्याला चावा घेऊन जखमी केले. हा धक्कादायक प्रकार जयभवानीनगरमध्ये (गल्ली नंबर १४ जवळ, मुकुंदवाडी, रेल्वे स्टेशन रोड) गुरुवारी घडला.

नेमकं काय घडलं?

याप्रकरणी मुकुंदवाडी पोलिस ठाण्यात गुन्हा दाखल करण्यात आला आहे. दरम्यान, तीन आरोपींच्या मुसक्या आवळण्यात आल्याचे तपास अधिकाऱ्यांनी सांगितले.
गुन्हे शाखेच्या अंमली पदार्थ प्रतिबंधक विभागाचे पोलिस उपनिरीक्षक संदीप शिंदे यांनी याबाबत तक्रार दिली. शिंदे यांच्यासह पोलिस कर्मचारी लाला खान पठाण, सतीश जाधव, महेश उगले पथकासह जय भवानीनगरमध्ये गेले होते. गल्ली नंबर १४ जवळ कर्तव्यावर होते. अंमली पदार्थाची बेकायदा विक्री गुन्ह्याच्या अनुंषगाने पथक चौकशी करीत असतानाच ज्ञानेश्वर उर्फ माऊली यादव (वय २९, रा. जय भवानीनगर), सागर मुळे (रा. जवाहर कॉलनी रोड), विकास वाहुळ ( वय ३०, रा. विश्रांतीनगर) व श्रीकर बादल ( रा. जय भवानीनगर) या चौघांनी पथक सरकारी कामकाज करत असताना अडथळा निर्माण करत हुज्जत घातली. धक्काबुक्की करून पोलिसांच्या हाताचा चावा घेत जखमी केले. तसेच एका पोलिस कर्मचाऱ्याच्या पायाला दगड मारून जखमी केले. दरम्यान, यादव, वाहुळ, बादल या तिघांना अटक करण्यात आली असून मुळे याचा शोध सुरू असल्याची माहिती तपास अधिकारी राऊत यांनी दिली.छत्रपती संभाजीनगर : महालक्ष्मींच्या हळदी कुंकवासाठी जाणाऱ्या एका महिलेच्या गळ्यातील सात तोळे वजनाचे मंगळसूत्र दुचाकीवरून आलेल्या चोरट्यांनी लांबवले. ही घटना महालक्ष्मी चौकातून अंबिकानगरकडे जाणाऱ्या रस्त्यावर गुरुवारी दुपारी तीनला घडली. याप्रकरणी मुकुंदवाडी पोलिस ठाण्यात गुन्हा दाखल करण्यात आला आहे. शुभांगी दिवटे असे फिर्यादीचे नाव आहे. त्यांच्या सासूबाई अंबिकानगर, मुकुंदवाडी येथे राहतात. सासूबाईंच्या निवासस्थानी महालक्ष्मींचे हळदी कुंकू होते. फिर्यादी व त्यांच्या जाऊबाई दोघी मोपेडवरुन जात होत्या.महालक्ष्मी चौकातून त्या जात असतानाच पाठीमागून दुचाकीवरून आलेल्या दोन चोरट्यांनी फिर्यादीच्या मोपेडसमोर येत गळ्यातील सोन्याचे पेशवाई गंठण हिसकावत पसार झाले. आरोपी अंदाजे २५ ते ३० वयोगटातील असून त्या दोघांनी हेल्मेट परिधान केलेले होते, असे तक्रारीत नमूद करण्यात आले आहे. याप्रकरणी दिवटे यांनी दिलेल्या तक्रारीवरुन मुकुंदवाडी पोलिस ठाण्यात गुन्हा दाखल करण्यात आला आहे. पोलिस उपनिरीक्षक घोरपडे तपास करीत आहेत.