मध्यरात्री चिमुकल्याचा रडण्याचा आवाज, वडील जातात तोवर उशीर, रुग्णालयात जाताच…

बुलढाणा : बुलढाणा जिल्ह्यातील इसरूळ येथील पाच वर्षीय चिमुकला घरात आई-वडिलांच्या सोबत अंथरुणावर झोपलेला असताना मन्यार या जातीच्या सापाने चावा घेतल्याने त्याचा अवघ्या दोन तासात मृत्यू झाला. ही घटना मंगळवार २४ सप्टेंबर रोजी इसरूळ तालुका चिखली येथे घडली. अत्यंत गरीब परिस्थितीत आपला उदरनिर्वाह चालवत असलेले शेक मेहबूब शेख गफुर नेहमीप्रमाणे घरामध्ये खाली अंथरून टाकून त्यांचा पाच वर्षांचा मुलगा अल्तमास याला एकाच गोधडीवर झोपले असताना साडेपाच वाजेच्या दरम्यान त्यांना त्यांच्या मुलाचा रडण्याचा आवाज आल्याने जाग आली.वडिलांनी उठून पाहिले असता त्यांना अंथरुणावर साप दिसला. मुलाला कुठे साप चावला का म्हणून याची चौकशी करत असताना त्यांना काहीच दिसून आले नाही. मात्र, काहीवेळाने त्या मुलाला त्रास जाणवू लागल्याने जवळच असलेल्या त्या सापाला मारून मुलाला उपचारासाठी चिखली येथील प्रथम डॉक्टर दळवी, डॉक्टर धनवे आणि नंतर योगीराज हॉस्पिटल येथे भरती करण्यात आले. परंतू साप खूपच विषारी असल्याने आणि वेळेत उपचार न झाल्याने त्या बालकाचा दुर्दैवी अंत झाला. या घटनेनं गावात सर्वत्र हळहळ व्यक्त होत आहे.ग्रामीण भागात त्यातच पावसाचे दिवस असल्यामुळे पावसाची रिपरिप सुरुच आहे. त्यामुळे झोपडी वजाघर असलेल्या परिसरात अनेकवेळा हे विषारी जातीचे साप आपलं घर करून बसतात. त्यामुळे अशा दुर्दैवी घटना समोर येतात. निदान अशा घटना घडल्यानंतर यामधून धडा घेत आपल्या घरामध्ये झोपण्याकरता एक खाट घेणे देखील आवश्यक आहे. अशा छोट्या बाबी आपल्या दैनंदिन जीवनात लक्षात ठेवणे आवश्यक आहे. त्यामुळे आपल्या घरात अशा दुर्दैवी घटनांना आळा घातला जाऊ शकतो.

१६ वर्षीय तरुणीला झोळीतून नेण्याची वेळ

दरम्यान. काही १५ ते २० दिवसांपूर्वी बुलढाणा जिल्ह्यातून मोठी बातमी समोर आली होती. जिल्ह्यातील जळगाव जामोद तालुक्यातल्या सातपुड्याच्या पर्वत रांगेत असलेल्या गोमाल या आदिवासी गावातील १६ वर्षीय तरुणीचा मृत्यू झाला. सायंकाळच्या सुमारास सागरी हिरू बामन्या (वय १६) या मुलीला अचानक उलट्या सुरू झाल्या. तिला दवाखान्यात दाखल करायचं होतं, पण रस्ता नसल्याने झोळी करून ग्रामस्थ भिंगार गावापर्यंत पोहोचले. मात्र वाटेतच मुलीचा दुर्दैवी मृत्यू झाल्याची धक्कादायक घटना समोर आली होती.