नवीन वर्ष २०२६ हे सर्वसामान्य नागरिकांसाठी आर्थिक, बँकिंग आणि तांत्रिक नियमांमध्ये महत्त्वाचे बदल घेऊन येणार आहे. १ जानेवारी २०२६ पासून लागू होणाऱ्या या बदलांचा थेट परिणाम नागरिकांच्या दैनंदिन जीवनावर आणि खर्चावर होणार आहे. विविध क्षेत्रांमध्ये होणाऱ्या या बदलांची सविस्तर माहिती पुढीलप्रमाणे—
डिजिटल व्यवहार आणि UPI नियम कडक
नवीन वर्षापासून UPI, सिम कार्ड आणि मेसेजिंग अॅप्सच्या नियमांमध्ये बदल होणार आहेत. फसवणूक रोखण्यासाठी सिम पडताळणी प्रक्रिया अधिक कडक करण्यात येणार आहे. यासोबतच WhatsApp, Telegramसारख्या मेसेजिंग अॅप्सवरही काही निर्बंध लागू होण्याची शक्यता आहे. डिजिटल व्यवहार अधिक सुरक्षित करण्यासाठी हे पाऊल उचलण्यात येत आहे.
पॅन-आधार लिंक अनिवार्य
पॅन आणि आधार लिंक करण्याची अंतिम मुदत डिसेंबर २०२५ अखेर संपणार आहे. १ जानेवारी २०२६ पासून पॅन-आधार लिंक नसेल, तर पॅन कार्ड निष्क्रिय होण्याची शक्यता आहे. याचा परिणाम आयटीआर रिफंड, बँकिंग व्यवहार तसेच सरकारी योजनांच्या लाभांवर होणार आहे.
नवीन आयकर कायदा लागू
एप्रिल २०२६ पासून १९६१ च्या आयकर कायद्याऐवजी नवीन आयकर कायदा २०२५ लागू होणार आहे. यामुळे आयटीआर भरण्याच्या नियमांमध्ये बदल होणार असून करदात्यांना नव्या नियमांनुसार व्यवहार करावे लागणार आहेत.
आठवा वेतन आयोग लागू होण्याची शक्यता
सरकारी कर्मचाऱ्यांसाठी २०२६ मध्ये आठवा वेतन आयोग लागू होण्याची शक्यता वर्तवली जात आहे. ३१ डिसेंबर २०२५ रोजी सातवा वेतन आयोग निष्प्रभ होईल. त्यामुळे जानेवारीपासून कर्मचाऱ्यांच्या वेतनात वाढ होण्याची अपेक्षा आहे.
बँकिंग क्षेत्रात व्याजदर बदल
एसबीआय, पंजाब नॅशनल बँक आणि एचडीएफसी बँक कर्जावरील व्याजदर कमी करण्याची शक्यता आहे. १ जानेवारीपासून नवीन कर्जदर आणि मुदत ठेवींचे व्याजदर लागू होणार असल्याने गृहकर्ज व इतर कर्जधारकांना दिलासा मिळू शकतो.
एलपीजी व इंधन दरात बदल
१ जानेवारीपासून एलपीजी सिलिंडरच्या किमतीत वाढ किंवा घट होण्याची शक्यता आहे. तसेच सीएनजी, पीएनजी आणि विमान इंधन (ATF) च्या दरातही बदल अपेक्षित आहे. याचा थेट परिणाम घरगुती बजेटवर होणार आहे.
शेतकरी व वाहन खरेदीदारांसाठी बदल
पीएम किसान योजनेअंतर्गत शेतकऱ्यांना नवीन युनिक आयडी दिला जाणार असून, पीक विमा योजनेंतर्गत वन्यप्राण्यांमुळे होणाऱ्या नुकसानीच्या तक्रारींचाही समावेश करण्यात येणार आहे. दरम्यान, २०२६ मध्ये कार आणि दुचाकींच्या किमती वाढण्याची शक्यता असून वाहन खरेदी महाग होण्याची चिन्हे आहेत.
एकूणच २०२६ हे वर्ष नियमबदलांचे ठरणार असून, नागरिकांनी नव्या नियमांची माहिती घेऊन योग्य नियोजन करण्याची गरज आहे.
Users Today : 8