📰 खैरखेड येथे विजेच्या धक्क्याने युवकाचा मृत्यू

सिंदखेड राजा 
तालुक्यातील खैरखेड येथे विजेच्या धक्क्याने २७ वर्षीय युवकाचा दुर्दैवी मृत्यू झाल्याची घटना घडली. अरविंद गंगाधर वाघ असे मृत युवकाचे नाव आहे.

मिळालेल्या माहितीनुसार, अरविंद वाघ हे सकाळी सुमारे साडेदहा वाजण्याच्या सुमारास आपल्या घरासमोरील गुरांच्या गोठ्यावरील टिन पत्रे दुरुस्तीकरिता काढत होते. यावेळी अचानक आलेल्या जोरदार वाऱ्यामुळे टिन पत्राचा तुकडा उचलला जाऊन जवळून गेलेल्या विद्युत वाहिनीच्या संपर्कात आला. परिणामी, त्यांना तीव्र विजेचा धक्का बसून त्यांचा जागीच मृत्यू झाला.

▶ धोकादायक वीजवाहिनीबाबत ग्रामस्थांचा संताप
ग्रामस्थांच्या मते, संबंधित ११ केव्ही वीजवाहिनी ही घरांच्या अगदी जवळून जात असून तारांमध्ये झोल होता. या धोकादायक परिस्थितीबाबत अरविंद वाघ यांनी यापूर्वी अनेक वेळा विद्युत विभागाकडे तोंडी तक्रारी केल्या होत्या. मात्र, त्याकडे दुर्लक्ष झाल्यानेच ही दुर्घटना घडल्याचा आरोप ग्रामस्थांनी केला आहे.

▶ पोलिसांची कार्यवाही
घटनेची माहिती मिळताच किनगाव राजा पोलिसांनी घटनास्थळी भेट देऊन पंचनामा केला. मृतदेह उत्तरीय तपासणीसाठी पाठविण्यात आला असून दुपारी अंत्यसंस्कार करण्यात आले.

वृत्त लिहीपर्यंत या प्रकरणी कोणताही गुन्हा दाखल करण्यात आलेला नव्हता. या घटनेमुळे खैरखेड गावावर शोककळा पसरली आहे.