📰 कार्यकर्त्यांशी चर्चा करूनच काँग्रेसचा जिल्हाध्यक्ष निवडणार; संघटन सृजन अभियानास प्रारंभ

बुलढाणा
काँग्रेस पक्ष संघटन बूथस्तरापर्यंत मजबूत करण्याच्या उद्देशाने ‘संघटन सृजन अभियान’ सुरू करण्यात आले असून, या अभियानाचा बुलढाणा जिल्ह्यात शनिवारपासून प्रारंभ झाला आहे. या अभियानांतर्गतच नवीन जिल्हाध्यक्षाची निवड कार्यकर्ते व पदाधिकाऱ्यांशी चर्चा करून केली जाणार असल्याची माहिती अभियानाचे समन्वयक अब्दुल हनान यांनी पत्रकार परिषदेत दिली.

बुलढाणा येथील जिल्हा काँग्रेस कमिटी कार्यालयात आयोजित पत्रकार परिषदेला जिल्हाध्यक्ष राहुल बोंद्रे, सह-समन्वयक विरेंद्र जगताप, प्रशांत पचाडे, ईश्वरी राठोड यांची उपस्थिती होती.

हनान यांनी सांगितले की, हे अभियान देशातील सुमारे २० राज्यांत राबविण्यात आले असून त्यातूनच स्थानिक स्तरावरील नेतृत्वाची निवड करण्यात आली आहे. बुलढाणा जिल्ह्यातही या अभियानाद्वारे बूथ ते राज्यस्तरापर्यंत पक्ष संघटना सशक्त करण्यावर भर दिला जाणार आहे. तसेच महिला व युवकांचा सहभाग वाढवणे, समर्पित कार्यकर्त्यांना संधी देणे आणि जबाबदाऱ्यांचे पारदर्शक वाटप करणे ही प्रमुख उद्दिष्टे आहेत.

▶ इच्छुकांसाठी अर्ज प्रक्रिया
जिल्हाध्यक्ष पदासह विविध पदांसाठी इच्छुक उमेदवारांना तीन पानांचा अर्ज सादर करावा लागणार आहे. त्यानंतर सहा नावांची शिफारस प्रदेश काँग्रेसकडे पाठवली जाईल आणि त्यातून अंतिम निवड केली जाणार असल्याचे हनान यांनी स्पष्ट केले.

▶ राहुल बोंद्रे यांचा निर्णय
गत १२ वर्षांपासून जिल्हाध्यक्ष म्हणून कार्यरत असलेले राहुल बोंद्रे यांनी यावेळी आपण पुन्हा अर्ज करणार नसल्याचे जाहीर केले. नवीन नेतृत्वाला संधी मिळावी, ही भूमिका त्यांनी मांडली. आगामी काळातही पक्षवाढीसाठी कार्यरत राहणार असल्याचे त्यांनी सांगितले.

▶ ‘मी काँग्रेसमध्येच’ – बोंद्रे
दरम्यान, पक्षांतराच्या चर्चांवर पूर्णविराम देताना राहुल बोंद्रे यांनी आपण काँग्रेसमध्येच राहणार असल्याचे स्पष्ट केले. शिवसेना आमदार संजय गायकवाड यांनी आपल्या निवासस्थानी भेट दिली होती, मात्र ती केवळ पाहुणचाराच्या निमित्ताने होती, असे त्यांनी सांगितले. राजकीय व वैचारिक मतभेद कायम असल्याचेही त्यांनी स्पष्ट केले.

▶ अभियानाचा पुढील कार्यक्रम
अभियानाचा पहिला टप्पा चार दिवसांचा असून विविध तालुक्यांत बैठका आयोजित करण्यात आल्या आहेत. रविवार, ५ एप्रिल रोजी चिखली, देऊळगाव राजा व लोणार येथे बैठका होतील. सोमवार, ६ एप्रिल रोजी मेहकर व खामगाव, तर मंगळवार, ७ एप्रिल रोजी शेगाव, नांदुरा व मलकापूर येथे ब्लॉक काँग्रेस बैठका पार पडणार आहेत.

या अभियानामुळे जिल्ह्यात काँग्रेस संघटनेला नवे बळ मिळेल, असा विश्वास पक्ष पदाधिकाऱ्यांनी व्यक्त केला आहे.