📰 रेणुका मातेच्या वहन मिरवणुकीला २३ तास; प्रदक्षिणा वेळेबाबत पुनर्विचाराची मागणी

चिखली
विदर्भासह राज्यभरातील लाखो भाविकांचे श्रद्धास्थान असलेल्या रेणुका मातेच्या वासंतिक नवरात्रोत्सवातील नगर प्रदक्षिणा (वहन मिरवणूक) यंदा तब्बल २३ तास चालल्याने प्रदक्षिणेच्या वाढत्या कालावधीबाबत पुनर्विचार करण्याची मागणी सुजाण नागरिकांकडून पुढे येत आहे.

गुरुवार, २ एप्रिल रोजी सायंकाळी सुमारे सात वाजता मंदिरापासून सुरू झालेली ही वहन मिरवणूक शुक्रवारी दुपारी समारोपास पोहोचली. वाघावर स्वार असलेल्या रेणुका मातेच्या पूर्णाकृती मूर्तीची ही मिरवणूक शहरातील विविध भागातून पार पडली. यामध्ये लोकमान्य टिळकनगर, बागवानपुरा, नगरपालिका परिसर, अण्णाभाऊ साठे चौक, संत रोहीदास नगर, राऊतवाडी, बुलढाणा बायपास, खामगाव नाका, बसस्थानक, छत्रपती शिवाजी महाराज चौक, जयस्तंभ चौक, सिमेंट रोड, चिंच परिसर व जुनागाव आदी भागांचा समावेश होता.

▶ वाढत्या कालावधीबाबत चिंता
नगर प्रदक्षिणेचा कालावधी वर्षागणिक वाढत असल्याने ग्रामीण भागातून व दूरवरून येणाऱ्या भाविकांना मोठ्या अडचणींचा सामना करावा लागत आहे. विशेषतः अनेक महिला भाविक ओटी भरल्याशिवाय अन्न ग्रहण करत नसल्याने त्यांना दीर्घकाळ प्रतीक्षा करावी लागत असल्याचे दिसून आले.

▶ शिस्तीचा अभाव ठरतो कारणीभूत
मिरवणुकीदरम्यान अनेक ठिकाणी वाहन थांबवून भाविकांकडून आरती, स्वागत व दर्शनासाठी होणारी गर्दी यामुळे वेळेचा मोठा अपव्यय होत असल्याचे निरीक्षण समोर आले आहे. काहीजण वहन रथावर चढून दीर्घकाळ थांबत असल्यानेही मिरवणुकीचा वेग मंदावतो.

तसेच काही ठिकाणी मोठ्या प्रमाणावर फटाके उडवून मिरवणूक थांबवली जाते. त्यामुळे बैल पुढे जाण्यास धजावत नसल्याने विलंब अधिक वाढतो, अशी माहिती समोर आली आहे.

▶ सोशल मीडियावरही प्रतिक्रिया
या प्रकाराबाबत सोशल मीडियावरही भाविकांनी नाराजी व्यक्त केली आहे. मिरवणुकीतील नियोजनाचा अभाव आणि शिस्तीचा अभाव यावर अनेकांनी टीका केली आहे.

▶ नियोजनाची गरज
मंदिर प्रशासनाने तसेच भाविकांनी एकत्रितपणे यावर उपाययोजना करणे आवश्यक असल्याचे मत व्यक्त होत आहे. विशिष्ट ठिकाणीच आरती मर्यादित ठेवणे, मिरवणुकीचा वेळ निश्चित करणे आणि शिस्त पाळणे या बाबींवर भर देण्याची गरज व्यक्त केली जात आहे.

या पार्श्वभूमीवर, भविष्यात रेणुका मातेच्या नगर प्रदक्षिणेचे नियोजन अधिक सुयोग्य पद्धतीने करून भाविकांच्या सोयीचा विचार केला जावा, अशी सर्वसामान्यांची अपेक्षा आहे.