बुलढाण्यात धर्मवीर छत्रपती संभाजी महाराज जन्मोत्सव उत्साहात तीन दिवसीय सोहळ्याला शिवभक्तांची मोठी उपस्थिती

बुलढाणा :

धर्मवीर छत्रपती Chhatrapati Sambhaji Maharaj यांच्या जयंतीनिमित्त बुलढाणा शहरात गेल्या ३६ वर्षांपासून साजरा होणारा जन्मोत्सव यंदाही उत्साह, भक्ती आणि शिवमय वातावरणात पार पडला. जयस्तंभ चौक येथील धर्मवीर छत्रपती संभाजी महाराज स्मारक परिसरात आयोजित तीन दिवसीय कार्यक्रमाला नागरिकांनी मोठ्या संख्येने उपस्थिती लावली.

धर्मवीर आखाडा आणि धर्मवीर छत्रपती संभाजी महाराज जयंती उत्सव समितीच्या वतीने आमदार Sanjay Gaikwad यांच्या नेतृत्वात या उत्सवाचे आयोजन करण्यात आले होते. प्रारंभी महाराजांच्या स्मारकाला अभिवादन करून कार्यक्रमाची सुरुवात करण्यात आली.

उत्सवाच्या पहिल्या दिवशी सुप्रसिद्ध गायक Avadhoot Gandhi यांच्या शिवगीत आणि शंभूगीतांच्या कार्यक्रमाने वातावरण भारावून गेले. शिवचरित्र, स्वराज्य आणि पराक्रमावर आधारित गीतांनी उपस्थित शिवभक्तांमध्ये उत्साह निर्माण केला.

यावेळी केंद्रीय राज्यमंत्री Prataprao Jadhav तसेच विविध मान्यवरांनी संभाजी महाराजांच्या प्रतिमेस अभिवादन केले. पारंपरिक वेशभूषेत सहभागी झालेल्या महिलांनी पाळणा सोहळ्यात सहभाग घेत भक्तिमय वातावरण निर्माण केले.

सायंकाळी मुंबईच्या “लालबाग बिट्स” वाद्यवृंदाच्या सादरीकरणासह लेझर शो आणि आकर्षक आतषबाजीमुळे उत्सवाला विशेष रंगत आली. जयस्तंभ चौक परिसर रोषणाई, फुलांची सजावट आणि ढोल-ताशांच्या गजराने उजळून निघाला होता.

दरम्यान, शुक्रवार १५ मे रोजी शहरातून भव्य शोभायात्रा काढण्यात येणार आहे. संगम चौकातून निघणाऱ्या या शोभायात्रेत घोडेस्वार मावळे, शिवकालीन वेशभूषेतील तरुण आणि मोठ्या संख्येने शिवभक्त सहभागी होणार आहेत.

सकाळी पारंपरिक पाळणा सोहळा आणि दुग्धाभिषेक कार्यक्रमही पार पडला. महिलांनी आरती व भक्तिगीते सादर करत महाराजांना अभिवादन केले. गेल्या ३६ वर्षांपासून सुरू असलेली ही परंपरा बुलढाण्यातील शिवभक्तांसाठी विशेष आकर्षण ठरत आहे.