बुलढाणा
वाहनधारकांसाठी परिवहन विभागाने उच्च सुरक्षा नोंदणी प्लेट (एचएसआरपी) अनिवार्य केली असून, येत्या १ जुलै २०२६ पासून या नियमाची कडक अंमलबजावणी करण्यात येणार आहे. निर्धारित मुदतीत एचएसआरपी नंबर प्लेट न बसविणाऱ्या वाहनधारकांवर १ हजार रुपयांचा दंड आकारण्यात येणार असल्याची माहिती माहिती व जनसंपर्क महासंचालनालयाकडून देण्यात आली आहे.
परिवहन विभागाच्या निर्देशानुसार, ज्या वाहनांची नोंदणी १ एप्रिल २०१९ पूर्वी झालेली आहे, त्या सर्व वाहनांना एचएसआरपी नंबर प्लेट लावणे बंधनकारक करण्यात आले आहे. यापूर्वी निश्चित करण्यात आलेली अंतिम मुदत आता वाढवून ३० जून २०२६ पर्यंत करण्यात आली आहे. त्यामुळे वाहनधारकांना दिलासा मिळाला असला, तरी १ जुलैपासून नियमभंग करणाऱ्यांवर दंडात्मक कारवाई करण्यात येणार असल्याचे स्पष्ट करण्यात आले आहे.
वाहनधारकांनी शेवटच्या क्षणी होणारी गर्दी टाळण्यासाठी अधिकृत डीलर किंवा ऑनलाइन पोर्टलच्या माध्यमातून तातडीने नोंदणी करून एचएसआरपी प्लेट बसवून घ्यावी, असे आवाहन प्रशासनाने केले आहे.
एचएसआरपी संदर्भातील महत्त्वाचे मुद्दे
- अंतिम मुदत : ३० जून २०२६ पर्यंत मुदतवाढ
- अनिवार्यता : १ जुलै २०२६ पासून जुन्या वाहनांना एचएसआरपी सक्तीची
- दंड : नियमांचे उल्लंघन केल्यास १,००० रुपये दंड
- कोणासाठी लागू? : १ एप्रिल २०१९ पूर्वी नोंदणी झालेल्या सर्व वाहनांसाठी
एचएसआरपी प्लेटचे फायदे
वाहन चोरीवर नियंत्रण
एचएसआरपी प्लेट अॅल्युमिनियमची बनविलेली असून, ती वाहनावर कायमस्वरूपी बसविली जाते. त्यामुळे ती सहज काढता येत नाही आणि वाहन चोरीच्या घटनांवर नियंत्रण ठेवण्यास मदत होते.
नंबर प्लेटमध्ये एकसमानता
सर्व वाहनांच्या नंबर प्लेटमध्ये एकसमान स्वरूप आल्याने वाहतूक नियंत्रण आणि तपासणी अधिक सुलभ होणार आहे.
डिजिटल ट्रॅकिंग सुलभ
एचएसआरपी प्लेटवरील लेझर कोडमुळे वाहनांची माहिती तातडीने ट्रेस करता येणार असून, प्रशासनाला वाहनांची माहिती जलद उपलब्ध होणार आहे.