मेहकर
मेहकर तालुक्यातील काही पेट्रोल आणि डिझेल पंपांवर डिझेलचा तुटवडा निर्माण झाल्यामुळे खरीप हंगामातील पावसाळापूर्व मशागतीच्या कामांना मोठा फटका बसत आहे. ट्रॅक्टर व शेती अवजारांसाठी आवश्यक असलेल्या इंधनाअभावी शेतकऱ्यांना रात्रंदिवस रांगेत उभे राहण्याची वेळ आली असून अनेक ठिकाणी तणावपूर्ण परिस्थिती निर्माण झाल्याचे चित्र दिसून येत आहे.
खरीप हंगामाची पूर्वतयारी सुरू असतानाच डिझेल मिळेल या आशेने शेतकरी आपले ट्रॅक्टर, चारचाकी वाहने तसेच डिझेल कॅन घेऊन पंपांवर मोठ्या संख्येने जमा होत आहेत. काही पंपांवर इंधन उपलब्ध झाल्याची माहिती पसरताच काही मिनिटांतच लांबच लांब रांगा लागल्या असून वाहतूक कोंडीसारखी परिस्थिती निर्माण होत आहे.
डिझेल भरण्याच्या क्रमावरून शेतकऱ्यांमध्ये वाद-विवाद वाढत असल्याचेही दिसून येत आहे. गर्दी नियंत्रित करण्यासाठी पंप परिसरात पोलिसांचा बंदोबस्त तैनात करण्यात आला असून शांतता व सुव्यवस्था राखण्यासाठी पोलिसांना सतत कर्तव्य बजावावे लागत आहे. काही ठिकाणी परिस्थिती नियंत्रणात ठेवण्यासाठी पोलिसांनी हस्तक्षेप करून गर्दीचे नियमन केले.
जानेफळ परिसरातील एका पंपावर डिझेल व पेट्रोल उपलब्ध होणार असल्याची माहिती पसरताच शेतकऱ्यांनी मागील दोन दिवसांपासूनच ट्रॅक्टरसह रांगा लावल्या होत्या. अखेर मर्यादित प्रमाणात इंधन उपलब्ध झाल्यानंतर वितरण प्रक्रिया सुरू करण्यात आली. मात्र उपलब्ध साठा अत्यल्प असल्याने प्रत्येक वाहनधारकाला इंधन मिळवण्यासाठी मोठी प्रतीक्षा करावी लागत आहे.
सदर पंपावर सुमारे चार हजार लिटर डिझेल व आठ हजार लिटर पेट्रोल उपलब्ध झाल्याची माहिती मिळाल्यानंतर वाहनांची एक किलोमीटरपर्यंत लांब रांग लागली होती. ट्रॅक्टर, चारचाकी, मालवाहू वाहने तसेच डिझेल कॅन घेऊन आलेल्या शेतकऱ्यांमध्ये इंधन मिळवण्यासाठी चढाओढ निर्माण झाली. यामुळे काही वेळेस वातावरण तापल्याचेही दिसून आले.
शेतकऱ्यांचे म्हणणे आहे की, खरीप हंगामाच्या महत्त्वाच्या काळातच डिझेलची कमतरता भासल्याने मशागतीची कामे खोळंबली आहेत. ट्रॅक्टर असूनही इंधनाअभावी शेतीची कामे थांबली आहेत. त्यामुळे आर्थिक व वेळेचे नुकसान होत असल्याची चिंता शेतकऱ्यांनी व्यक्त केली आहे.
स्थानिक पातळीवर इंधन पुरवठा सुरळीत न झाल्यास शेती उत्पादनावर परिणाम होण्याची शक्यता वर्तवली जात आहे. काही शेतकऱ्यांनी पर्यायी व्यवस्थेचा विचार करावा लागत असल्याचे सांगत पारंपरिक शेती पद्धतीकडे पुन्हा वळण्याची वेळ येऊ शकते, असेही मत व्यक्त केले.
दरम्यान, पंप व्यवस्थापनाकडून मर्यादित पुरवठा मिळत असल्याने वितरण नियंत्रित पद्धतीने केले जात आहे. प्रत्येक ग्राहकाला प्रमाणानुसार इंधन देण्याचा प्रयत्न सुरू आहे. परिस्थिती नियंत्रणात ठेवण्यासाठी स्थानिक प्रशासन व पोलिस यंत्रणा सतत कार्यरत आहे.
या संपूर्ण परिस्थितीमुळे पंप परिसरात यात्रेसारखी गर्दी पाहायला मिळत असून शेतकरी व वाहनधारकांची गैरसोय वाढली आहे. तातडीने इंधन पुरवठा सुरळीत न झाल्यास परिस्थिती अधिक गंभीर होण्याची शक्यता नाकारता येत नाही.
स्थानिक शेतकरी संघटनांनी प्रशासनाकडे इंधन पुरवठा वाढवून नियमित वितरण व्यवस्था सुरळीत करण्याची मागणी केली आहे.