मेहकर
समृद्धी महामार्गावर मांडवा गावाजवळ झालेल्या मोठ्या खड्ड्यामुळे गंभीर अपघातांची शक्यता निर्माण झाली होती. मात्र मेहकर येथील दोन युवकांच्या प्रसंगावधानामुळे अनेक वाहनांचे नुकसान टळले आणि मोठी दुर्घटना टळल्याची घटना मंगळवारी समोर आली.
### दीड ते दोन फुट खोल खड्डा
मेहकरहून मुंबईकडे जाणाऱ्या समृद्धी महामार्गाच्या पहिल्या लेनमध्ये सुमारे दीड ते दोन फुट खोल आणि अंदाजे दोन मीटर व्यासाचा मोठा खड्डा पडला होता. या खड्ड्यामुळे भरधाव वेगाने येणाऱ्या अनेक वाहनांचे टायर फुटले, तर काही वाहनांच्या चाकांचे आणि बॉडीचे नुकसान झाले. काही वाहनांचे मॅक व्हीलही तुटल्याची माहिती मिळाली.
### युवकांनी दाखवले प्रसंगावधान
रात्री सुमारे ९.३० वाजता या ठिकाणी निर्माण झालेली धोकादायक परिस्थिती लक्षात घेऊन मेहकर येथील दोन युवकांनी तातडीने पुढाकार घेतला. त्यांनी खड्ड्याभोवती बॅरिकेट्स लावून वाहनांना सुरक्षित लेनमध्ये वळवण्याचे काम केले.
या युवकांची नावे *आदिल खान दिलावर खान* आणि *इरफान खान जब्बार खान* अशी आहेत.
### मोठा अपघात टळला
युवकांच्या तत्परतेमुळे भरधाव वाहनांचा धोका कमी झाला आणि संभाव्य मोठा अपघात टळला. अन्यथा अनेक वाहनांचे टायर फुटून गंभीर अपघात तसेच जीवितहानी होण्याची शक्यता व्यक्त केली जात होती. काही वेळ वाहतूकही विस्कळीत झाली होती.
### प्रशासनाला सूचना
घटनेची माहिती मिळताच आमदार सिद्धार्थ खरात यांनी घटनास्थळी परिस्थितीची पाहणी केली. त्यांनी संबंधित टोल प्लाझा व महामार्ग विभागाच्या कार्यकारी अभियंत्यांना तातडीने संपर्क करून बॅरिकेट्स वाढवणे आणि खड्डा त्वरित दुरुस्त करण्याच्या सूचना दिल्या.
### नागरिकांकडून कौतुक
या घटनेनंतर स्थानिक नागरिक आणि प्रवाशांकडून दोन्ही युवकांच्या तत्परतेचे आणि सामाजिक बांधिलकीचे कौतुक केले जात आहे. त्यांच्या सतर्कतेमुळे अनेकांचे प्राण वाचल्याची भावना व्यक्त होत आहे.