पूर्वी मंत्रालयाच्या विविध केंद्रीय योजनांअंतर्गत आर्थिक प्रस्तावांचे अर्ज, मंजुरी आणि देखरेखीची प्रक्रिया अत्यंत गुंतागुंतीची व वेळखाऊ मानली जात होती. अनेक स्तरांवरील कागदपत्रे, मंजुरीतील विलंब आणि माहितीच्या अभावामुळे लाभार्थ्यांना अडचणींचा सामना करावा लागत होता.
मात्र आता शासनाच्या ‘अनुदान अभिनव पोर्टल’ या डिजिटल उपक्रमामुळे या संपूर्ण प्रक्रियेत मोठा सकारात्मक बदल होणार आहे. या पोर्टलचा मुख्य उद्देश म्हणजे अनुदान व्यवस्थापन प्रक्रियेत (Grant Management Process) १०० टक्के पारदर्शकता, कार्यक्षमता, उत्तरदायित्व आणि सुलभ प्रवेश सुनिश्चित करणे हा आहे.
या नव्या प्रणालीमुळे अर्ज सादर करणे, प्रस्तावांची ऑनलाइन पडताळणी, मंजुरी प्रक्रिया आणि निधी वितरण अधिक वेगवान व सुटसुटीत होणार आहे. तसेच अर्जदारांना त्यांच्या प्रस्तावांची सद्यस्थिती ऑनलाइन पाहता येणार असल्याने प्रशासनातील पारदर्शकता अधिक बळकट होणार आहे.
डिजिटल तंत्रज्ञानाच्या माध्यमातून शासन आणि लाभार्थी यांच्यातील संवाद अधिक प्रभावी करण्याचा प्रयत्न या पोर्टलद्वारे करण्यात येत असून, त्यामुळे संपूर्ण व्यवस्था अधिक गतिमान, सुलभ आणि उत्तरदायी बनेल, असा विश्वास व्यक्त करण्यात येत आहे.