बुलढाणा
जिल्ह्यातील सुशिक्षित बेरोजगार युवक-युवती तसेच अल्प मुदतीचे रोजगारक्षम अभ्यासक्रम पूर्ण केलेल्या उमेदवारांसाठी रोजगाराची मोठी संधी उपलब्ध झाली आहे. जिल्हा कौशल्य विकास, रोजगार व उद्योजकता मार्गदर्शन केंद्र तथा मॉडेल करिअर सेंटर, बुलढाणा आणि शासकीय औद्योगिक प्रशिक्षण संस्था (ITI) यांच्या संयुक्त विद्यमाने शुक्रवार, दि. २२ मे रोजी ‘पंडित दीनदयाल उपाध्याय प्लेसमेंट ड्राइव्ह तथा रोजगार मेळावा’ आयोजित करण्यात आला आहे.
हा रोजगार मेळावा शासकीय औद्योगिक प्रशिक्षण संस्था (ITI), बुलढाणा येथे सकाळी १० वाजल्यापासून होणार असून प्रधानमंत्री इंटर्नशिप योजना (PMIS) अंतर्गत रोजगाराच्या संधी उपलब्ध करून देण्याचा उद्देश आहे.
या मेळाव्यात Mahindra & Mahindra तसेच Shinenumeru Nirman Pvt. Ltd. या नामांकित कंपन्यांनी त्यांच्या रिक्त पदांची अधिसूचना दिली आहे. कंपनी प्रतिनिधींकडून उमेदवारांच्या प्रत्यक्ष मुलाखती घेऊन प्राथमिक निवड करण्यात येणार असून, निवड झालेल्या उमेदवारांना प्रशिक्षणाची संधीही उपलब्ध करून दिली जाणार आहे.
१० वी, १२ वी, आयटीआय, पदवीधर तसेच STEP अंतर्गत प्रशिक्षण पूर्ण केलेले पुरुष व महिला उमेदवार या रोजगार मेळाव्यात सहभागी होऊ शकतात. पात्र उमेदवारांना त्यांच्या शैक्षणिक पात्रतेनुसार एकापेक्षा अधिक पदांसाठी मुलाखत देण्याची संधी मिळणार आहे.
उमेदवारांनी आवश्यक कागदपत्रांसह २२ मे रोजी सकाळी १० वाजता स्वखर्चाने उपस्थित राहून नोंदणी करावी व मुलाखत प्रक्रियेत सहभागी व्हावे, असे आवाहन जिल्हा कौशल्य विकास, रोजगार व उद्योजकता मार्गदर्शन केंद्राचे सहायक आयुक्त ग. प्र. बिटोडे यांनी केले आहे.
अधिक माहितीसाठी जिल्हा कौशल्य विकास, रोजगार व उद्योजकता मार्गदर्शन केंद्र, बुलढाणा कार्यालयाशी दूरध्वनी क्रमांक ०७२६२-२४२३४२ वर संपर्क साधावा.