जळगाव जामोद :
जळगाव जामोद तालुक्यातील राजुरा (भालांजन) येथे कौटुंबिक कलहातून घडलेल्या हृदयद्रावक घटनेने संपूर्ण जिल्हा हादरला आहे. विजय मुसा किराडिया (वय ३०) याने आपल्या चार निष्पाप मुलांना विहिरीत फेकून स्वतःही आत्महत्या केल्याची धक्कादायक घटना सोमवारी सकाळी उघडकीस आली. या घटनेत प्रीत (७), प्राची (५), पूर्वी (४) आणि दीड वर्षीय पीयूष या चार चिमुकल्यांचा दुर्दैवी मृत्यू झाला.
या घटनेने संपूर्ण राजुरा गावावर शोककळा पसरली असून समाजमन सुन्न झाले आहे. कौटुंबिक तणाव आणि मानसिक नैराश्य किती भीषण रूप धारण करू शकते, याचे हे विदारक उदाहरण मानले जात आहे.
विहिरीत मृतदेह पाहताच आजोबांचा हंबरडा
दररोजच्या नित्यक्रमाप्रमाणे सोमवारी सकाळी विजयचे वडील मुसा किराडिया हे शेतातील विहिरीवर पाणी काढण्यासाठी गेले होते. विहिरीत डोकावताच त्यांना आपल्या नातवंडांचे मृतदेह पाण्यावर तरंगताना दिसले. हे दृश्य पाहताच त्यांनी एकच हंबरडा फोडला. त्यांचा आक्रोश ऐकून परिसरातील ग्रामस्थ घटनास्थळी धावत आले.
विहिरीतून एकामागोमाग बाहेर काढले जात असलेले चार निष्पाप चिमुकल्यांचे मृतदेह पाहून उपस्थित ग्रामस्थांच्या काळजाचा थरकाप उडाला. काही तासांपूर्वी अंगणात खेळणारी आणि आईच्या कुशीत विसावणारी लेकरं अचानक काळाच्या पडद्याआड गेल्याने संपूर्ण गाव सुन्न झाले.
गावकऱ्यांच्या डोळ्यांत अश्रू
ग्रामस्थांच्या माहितीनुसार, चारही मुले अत्यंत निरागस व खेळकर स्वभावाची होती. मोठी मुलगी प्रीत शाळेत जात होती, तर प्राची आणि पूर्वी दिवसभर घराभोवती खेळत असत. दीड वर्षीय पीयूष अजून व्यवस्थित बोलायलाही शिकला नव्हता. या मुलांच्या किलबिलाटाने परिसर कायम गजबजलेला असायचा.
घटनेची माहिती सकाळी गावात पसरताच नागरिकांनी मोठी गर्दी केली. काही युवक मदतीसाठी पुढे सरसावले. मृतदेह बाहेर काढताना अनेकांचे हात थरथरत होते. गावातील वृद्धांनाही अश्रू आवरत नव्हते. अनेकांनी आपापली कामे बाजूला ठेवून मृतांच्या घरी धाव घेतली.
“कौटुंबिक अडचणी आणि तणाव असतील, पण निष्पाप लेकरांचे आयुष्य संपवणे अत्यंत वेदनादायी आहे,” अशा भावना ग्रामस्थांनी व्यक्त केल्या.
एकाच सरणावर पाच जणांवर अंत्यसंस्कार
सोमवारी सायंकाळी राजुरा शिवारातील शेतात विजय किराडिया आणि त्याच्या चार चिमुकल्या मुलांवर अंत्यसंस्कार करण्यात आले. या वेळी परिसरातील नागरिक मोठ्या संख्येने उपस्थित होते. पाचही मृतदेहांवर एकाच सरणावर अंत्यसंस्कार करण्यात आल्याने उपस्थितांचे डोळे पाणावले आणि वातावरण शोकमग्न झाले.
विजय किराडिया यांच्या पश्चात वृद्ध आई-वडील, पत्नी आणि दोन भाऊ असा परिवार आहे.
सुखी संसाराला कुणाची लागली दृष्ट?
ग्रामस्थांच्या माहितीनुसार, विजय किराडियाचा संसार व्यवस्थित सुरू होता. चार एकर शेती, दोन म्हशी, तीस ते पस्तीस बकऱ्या आणि चार गोंडस अपत्यांमुळे कुटुंब आनंदात असल्याचे सांगितले जाते. विजय मेहनती स्वभावाचा होता आणि त्याला कोणतेही व्यसन नव्हते, अशी माहिती गावकऱ्यांनी दिली.
मात्र पती-पत्नीतील वादातून एका रात्रीत संपूर्ण कुटुंब उद्ध्वस्त झाल्याने गावात हळहळ व्यक्त होत आहे.
पोलिस अधीक्षकांची घटनास्थळी भेट
घटनेची माहिती मिळताच पोलिस अधीक्षक नीलेश तांबे तसेच पोलिस उपविभागीय अधिकारी आनंद महाजन यांनी घटनास्थळी भेट देऊन पाहणी केली. पोलिसांकडून घटनेचा सखोल तपास सुरू असून कौटुंबिक वादातून हे टोकाचे पाऊल उचलण्यात आल्याचा प्राथमिक अंदाज व्यक्त करण्यात येत आहे.
मानसिक आरोग्याचा प्रश्न पुन्हा ऐरणीवर
या घटनेमुळे ग्रामीण भागातील वाढते कौटुंबिक तणाव, आर्थिक दडपण, मानसिक नैराश्य आणि संवादाचा अभाव यांचा प्रश्न पुन्हा एकदा ऐरणीवर आला आहे. समाजात मानसिक आरोग्य, समुपदेशन आणि कुटुंबीयांमधील संवाद याबाबत जागरूकता निर्माण करण्याची गरज या घटनेने अधोरेखित केली आहे.