अंत्यसंस्कारावेळी घडली धक्कादायक घटना, २५ वर्षीय तरुण चक्क तिरडीवरच उठून बसला

पातूर तालुक्यातील विवरा येथील घटना योगेश नागोलकार पातूर : अकोला जिल्ह्यातील पातूर तालूक्यातल्या विवरा गावातील प्रशांत मेसरे या २५ वर्षीय तरुणाचा काल संध्याकाळी मृत्यू झाला होता. मात्र, स्मशानात नेतांना तो चक्क उठून बसल्याची धक्कादायक घटना घडली आहे. सध्या त्याला पुढील उपचारासाठी अकोल्यात घेऊन जाण्यात आलं आहे. या तरूणाला पाहण्यासाठी गावात मोठी गर्दी झाली होती. या मागील कारण नेमकं काय? याचा तपास पोलीस करत आहेत. काही लोक याला दैवी चमत्कार समजतायेत. तर काही वैद्यकीय चूक समजत आहेत. प्रशांत हा होमगार्डमध्ये असून त्याच्या अंगात येत असल्याची माहिती गावकऱ्यांनी दिली आहे. तो एका मांत्रिकाच्या संपर्कात असल्याचंही गावकरी सांगत आहेत.मिळालेल्या माहितीनुसार, प्रशांत रामकृष्ण मेसरे हा युवक अकोला पोलिस दलातील चान्नी पोलिसांत कार्यरत आहे. प्रशांत गेल्या दोन दिवसांपासून आजारी होता. बुलडाणा जिल्ह्यातील चिखली इथे त्याच्यावर उपचार सुरु होता. उपचारादरम्यान त्याचा मृत्यू झाला असं समजलं त्यानंतर नातेवाईकांनी त्याला अंत्यविधीसाठी अकोला जिल्ह्यातील विवरा गावात आणले. काल रात्री ७ वाजेच्या सुमारास त्याच्यावर अंत्यविधीची करण्याची तयारी सुरु झाली. प्रशांतला तिरडीवर बांधण्यात आलेत. गावकऱ्यांसह नातेवाईक त्याला घेवून अंत्यसंस्कारासाठी स्मशानभूमीकडे रवाना झाले.रस्त्याच्या वाटेतच एक तांत्रिक महाराज आडवा आला आणि म्हणाला “मी प्रशांतला जिवंत करतोय. त्याला घेवून चला”, त्यानंतर तो महाराज प्रशांतला घेऊन एका खोलीमध्ये गेला. हे पाहण्यासाठी हजारो संख्येने नागरिक उपस्थित होते. दरम्यान, काही कालावधीनंतर प्रशांत आणि महाराज दोघेही रुमच्या बाहेर आले. पाहतो तर काय, प्रशांत जिवंत झाला. हे पाहून उपस्थित असलेल्या अनेकांना धक्का बसला. तांत्रिक महाराजने एका खोलीमध्ये पूजा वगैरे करून त्याला जिवंत केल्याचा दावा केला. याची माहिती चान्नी पोलिसांना मिळाली, पोलिसही घटनास्थळी दाखल झाले.त्यानंतर पोलिसांनी प्रशांतसह महाराजाची चौकशी सुरू केली. दरम्यान गावातील पोलीस पाटील यांनी दिलेल्या माहितीनुसार तांत्रिक महाराज आणि प्रशांत दोघेही एकमेकांच्या संपर्कात होते. प्रशांतने मृत्यूचं सर्व बनाव केला असल्याचं लक्षात आलं आहे. प्रशांतने हा मृत्यूचा कट का रचला? हा तांत्रिक महाराज नेमका कोण आहे? या संदर्भात अधिक चौकशी सुरू आहे. तांत्रिक महाराज हा १८ वर्षाचा असून मध्य प्रदेश मधील रहिवासी असल्याचा सांगण्यात येत आहे.पोलिस म्हणतात वैद्यकीय चूक दरम्यान, प्रशांत मेसरे हा बेशुद्ध अवस्थेत होता त्यामुळे त्याच्यात कुठल्याही हालचाली झाल्या नव्हत्या. कदाचित नातेवाईक आणि गावकऱ्यांना वाटले असावे की त्याचा मृत्यू झाला असावा. म्हणूनच त्याच्यावर अंत्यसंस्कार केला जात असल्याचा समजते. सध्या या प्रकरणात कोणालाही ताब्यात घेण्यात आलं नाहीये.