मराठी भाषा संवर्धन पंधरवडा साजरा करण्याचे आवाहन

बुलडाणा, दि. 5 : मराठी भाषा संवर्धन पंधरवडा साजरा करण्यासाठी विविध उपक्रमांचे आयोजन करावे, असे आवाहन करण्यात आले आहे.

जिल्ह्यात दि. 14 जानेवारी 2023 ते दि. 28 जानेवारी 2023 या कालावधीत मराठी भाषा संवर्धन पंधरवडा साजरा करण्यात येणार आहे. राज्यातील सर्व शासकीय, निमशासकीय, कार्यालये, महामंडळे,, राज्यातील केंद्र शासनाच्या अखत्यारीतील सर्व कार्यालय, मंडळे, महामंडळे, सार्वजनिक उपक्रम, सर्व खाजगी आणि व्यापारी बँका, सर्व शैक्षणिक संस्था, विद्यापीठे, महाविद्यालये आदी संस्थांनी दि. 14 जानेवारी ते दि. 28 जानेवारी 2023 या कालावधीत मराठी भाषा संवर्धन पंधरवडा साजरा करावा, असे आवाहन जिल्हा प्रशासनाने केले आहे.

राज्यातील खाजगी चित्रीकरण स्थळांची माहिती पाठविण्याचे आवाहन 

मुंबई, राज्यातील खाजगी मालकीच्या चित्रीकरण स्थळांची माहिती जास्तीत जास्त निर्मिती संस्थांना कळावी यासाठी संबधित चित्रीकरण स्थळांचे मालक  अथवा संस्थांनी गुगल ड्राईव्हवर स्थळांची विस्तृत माहिती, छायाचित्र, व्हिडीओ आणि संपर्क क्रमांक पाठविण्याचे आवाहन महाराष्ट्र चित्रपट, रंगभूमी आणि सांस्कृतिक विकास महामंडळाने (चित्रनगरी/फिल्मसिटी) केले आहे.महाराष्ट्र हे मनोरंजन क्षेत्रातील नावाजलेले राज्य असून देश-विदेशातील निर्मिती संस्था येथे चित्रीकरण करण्यासाठी प्राधान्याने येत असतात. सध्या राज्यातील विविध ठिकाणी खाजगी चित्रीकरण स्थळ विकसित होत आहेत. ही चित्रीकरण स्थळे विविध निर्मिती संस्थांना माहिती व्हावीत यासाठी महामंडळ पुढाकार घेत आहे. यासाठी चित्रीकरणायोग्य अशा मालमत्ताधारकांनी महामंडळास संपर्क साधून आपल्या स्थळांची परिपूर्ण माहिती कळविल्यास, महामंडळ विविध प्रसिद्धीमाध्यमाद्वारे चित्रीकरण स्थळांची माहिती निर्मितीसंस्थांपर्यंत पोहोचविण्याचे काम करेल. याद्वारे नागरिकांना अधिकचे उत्पन्न प्राप्त होईल आणि त्यांच्या स्थळांची प्रचार-प्रसिद्धी होईल.अधिक माहितीसाठी www.filmcitymumbai.org, www.filmcell.maharashtra.gov या संकेतस्थळांवर भेट देता येईल.  गुगल ड्राईव्ह लिंक वरील संकेतस्थळावर उपलब्ध आहे.