लोणारच्या दैत्यसूदन मंदिरात ‘प्रकाशाभिषेक’ सोहळ्याची पर्वणी

लोणार :

बुलढाणा जिल्ह्यातील ऐतिहासिक Daityasudan Temple येथे १५ मेपासून पुढील पाच दिवस निसर्ग आणि भारतीय स्थापत्यकलेचा अद्भुत संगम अनुभवायला मिळणार आहे. सकाळी ११ ते दुपारी १ या वेळेत सूर्यकिरणे थेट मंदिरातील भगवान विष्णूंच्या चरणांवर पडून ‘प्रकाशाभिषेक’ घडणार असल्याने भाविक आणि पर्यटकांमध्ये उत्सुकता निर्माण झाली आहे.

पुरातन भारतीय खगोलशास्त्र, वास्तुकला आणि मंदिर रचनेतील अचूकतेचे हे अनोखे उदाहरण मानले जाते. मंदिराच्या विशिष्ट स्थापत्यरचनेमुळे वर्षातील ठराविक दिवसांमध्ये सूर्यकिरणे गर्भगृहात प्रवेश करून श्री विष्णूंच्या चरणांना स्पर्श करतात. या दुर्मिळ सोहळ्याला ‘प्रकाशाभिषेक’ म्हणून ओळखले जाते.

या नैसर्गिक आणि आध्यात्मिक सोहळ्याचा अनुभव घेण्यासाठी राज्यासह देश-विदेशातील पर्यटक आणि भाविक लोणार नगरीत दाखल होत आहेत. विशेषतः छायाचित्रकार, इतिहास अभ्यासक आणि पुरातत्त्व प्रेमींसाठी हा सोहळा आकर्षणाचा केंद्रबिंदू ठरत आहे.

लोणार येथील दैत्यसूदन मंदिर हे प्राचीन हेमाडपंथी स्थापत्यशैलीचे उत्कृष्ट उदाहरण मानले जाते. धार्मिक आणि ऐतिहासिक महत्त्वामुळे या मंदिराला विशेष ओळख असून, ‘प्रकाशाभिषेक’ सोहळ्यामुळे त्याचे वैशिष्ट्य अधिक अधोरेखित होते.