पुणे स्टेशनवर प्रवाशांना चोवीस तास ताजे खाद्यपदार्थ मिळणार,‘रेस्टॉरंट ऑन व्हील’चे उद्घाटन, ऑनलाइन बुकींगची सोय

पुणे : पुणे रेल्वे स्टेशनच्या विभागीय कार्यालयाजवळ असलेल्या जागेत ‘रेस्टॉरंट ऑन व्हील’ सुरू करण्यात आले आहे. त्यामुळे प्रवाशांना आता चोवीस तास ताजे खाद्यपदार्थ मिळणार आहेत. पुणे विभागात सुरू झालेले हे दुसरे ‘रेस्टॉरंट ऑन व्हील’ आहे.पुणे रेल्वे विभागाच्या व्यवस्थापक इंदू दुबे यांच्या मार्गदर्शनात रेल्वेचे वरिष्ठ विभागीय वाणिज्य व्यवस्थापक डॉ. मिलिंद हिरवे यांचे नेतृत्वात ‘रेस्टॉरंट ऑन व्हील’चे बुधवारी उद्घाटन करण्यात आले. यावेळी विभागीय वाणिज्य व्यवस्थापक व जनसंपर्क अधिकारी डॉ. रामदास भिसे, हल्दीराम- नागपूरचे संचालक नीरज अग्रवाल, अमोल भगत उपस्थित होते.पुणे रेल्वे स्थानकावरील रेल्वे कोच रेस्टॉरंट १०० चौरस मीटर क्षेत्रफळावर रेल्वेच्या कोचमध्ये तयार करण्यात आले आहे.प्रवाशांना या ठिकाणी चोवीस तास खाद्यपदार्थ मिळणार आहेत. तसेच, प्रवाशांना पार्सल सुविधा देखील करण्यात आली आहे. या रेस्टॉरंटमधून रेल्वेला वर्षाला ६० लाख रूपयांचे उत्पन्न मिळणार आहे.‘रेस्टॉरंट ऑन व्हील’मध्ये लवकरच रेल्वेतून प्रवास करणाऱ्या प्रवाशांना ऑनलाईन पदार्थ बुकींग करण्याची सोय केली जाणार आहे. त्यासाठी प्रवाशांना ६० किलोमीटर अंतरावरून त्यांना हवा तो पदर्था ऑर्डर करून ठेवावा लागेल. रेल्वे गाडी स्थानकावर आल्यानंतर जागेवर तो पदार्थ प्रवाशांना मिळेल, अशी सोय केली जाणार आहे. सध्या नागपूर स्थानकावर ही सोय आहे.रेल कोच रेस्टॉरंट हा भारतीय रेल्वेचा एक अभिनव उपक्रम आहे ज्याने अनेक राज्यांतील प्रवासी आणि लोकांमध्ये लोकप्रियता मिळवली आहे.
पुणे रेल्वे विभागावर विभागीय रेल्वे व्यवस्थापक श्रीमती इन्दू दुबे , अतिरिक्त विभागीय रेल्वे व्यवस्थापक श्री बृजेशकुमार सिंह यांचे मार्गदर्शनात तसेच वरिष्ठ विभागीय वाणिज्य व्यवस्थापक डॉ. मिलिंद हिरवे यांचे नेतृत्वात रेल्वे कोच रेस्टॉरंट २२ नोव्हेंबरपासून पुणे स्थानक येथे सुरू करण्यात आला आहे जो पुणे विभागातील अशा प्रकारचा दुसरा रेस्टॉरंट आहे.पुणे रेल्वे स्थानकावरील रेल्वे कोच रेस्टॉरंट १०० चौरस मीटर क्षेत्रफळावर बांधण्यात आले असून ताडीवाला रोड परिसरात पुणे विभागीय रेल्वे व्यवस्थापक कार्यालयाजवळ आहे.