पुणे : सासऱ्याच्या इच्छेनुसार घरजावई होण्यास नकार दिल्यानंतर पत्नीपासून पंधरा वर्षे विभक्त राहणाऱ्या पतीने घटस्फोट घेण्याचा घेतलेला निर्णय वकिलाच्या समुपदेशनानंतर मागे घेतला. वकिलाने परिस्थितीची जाणीव करून दिल्याने दाम्पत्याने त्यांच्या नात्याची रेशीम गाठ पुन्हा घट्ट केली; तसेच नव्याने संसार सुरू करताना पतीने पत्नीच्या आईलाही त्यांच्या कुटुंबात सामावून घेतले.
सागर (वय ५५) आणि सागरिका (वय ४९) (नावे बदलली आहेत) अशी दोघांची नावे आहेत. सागर हे व्यावसायिक आहेत. सागरिका या गृहिणी आहेत. सागरिका या आई-वडिलांची एकुलते एक आपत्य. सागर आणि सागरिका यांचा २००६मध्ये विवाह झाला. सागरिकाचे वडील सरकारी नोकर होते. त्यांना मुलीने आपल्याकडेच कोल्हापूर येथे जावयासह राहायला यावे, असे वाटत होते. सागरला घरजावई होणे मान्य नव्हते; तसेच सासऱ्यांच्या संपत्तीचीही हाव नव्हती. पती आणि वडील यांच्यामध्ये सागरिका द्वीधा मनस्थितीत अडकली होती. या गोष्टीमुळे सागर आणि सागारिकामध्ये वाद होत होते; तसेच त्यांचे स्वभावही भिन्न होते. त्यामुळे ते २००८पासून विभक्त राहू लागले. ते दोघे २०१५मध्ये पुन्हा एकत्र राहू लागले. मात्र, जेमतेम पाच ते सहा महिनेच त्यांचा संसार टिकला. त्यानंतर ते पुन्हा वेगळे झाले. या दरम्यान सागरिका यांच्या वडिलांचा मृत्यू झाला.सागर यांनी घटस्फोट घेण्याच्या इच्छेने अॅड. राहुल जाधव यांची मदत घेतली. मात्र, अॅड. जाधव यांनी दोघांचे समुपदेशन केले. दोघांचा एकामेकांवर विश्वास असल्याचे अॅड. जाधव यांच्या लक्षात आले. दोघांनी केलेली चूक अॅड. जाधव यांनी त्यांच्या लक्षात आणून दिली. त्यानंतर सागर यांनी सागरिकाच्या आईचा सांभाळ करण्याचे मान्य केले. त्यानंतर सागर, सागरिका, सागर यांची आई आणि सागरिका यांची आई एकत्र गुण्यागोविंदाने राहत आहेत.
अलीकडच्या काळात एक अपत्य असणाऱ्या दाम्पत्यांची संख्या मोठी आहे. लग्नाच्या वेळीच जावयाला सासू-सासऱ्यांची जबाबदारी स्वीकारावी लागणार असल्याबाबत कल्पना दिली पाहिजे; तसेच सुनेलाही तिच्या सासू-सासऱ्यांच्या जबाबदारीची जाणीव करून दिली पाहिजे. त्यामुळे लग्नानंतर वडिलधाऱ्यांना सांभाळण्यावरून दाम्पत्यात वाद होणार नाहीत. वडीलधाऱ्यांचीही हेळसांड होणार नाही.
Users Today : 16