पिंपरी : चेन्नई येथील अपोलो रुग्णालयात फुफ्फुस प्रत्यारोपण शस्त्रक्रियेसाठी पिंपरी चिंचवड येथील डीवाय पाटील रुग्णालयातून चेन्नई येथे फुप्फुस घेऊन निघालेल्या रुग्णवाहिकेचा टायर फुटून अपघात झाला होता. या अपघातात रुग्णवहिकेत असणारे डॉक्टर देखील जखमी झाले होते. मात्र एका व्यक्तीवर शस्त्रक्रिया करून त्या व्यक्तीला जीवदान द्यायचे असल्याने डॉक्टरांनी प्रसंगावधान राखत खाजगी वाहनाने लोहगाव विमानतळपर्यंत प्रवास केला. त्यानंतर विमानाने चेन्नई गाठत संबंधित रुग्णाचे प्राण वाचवले आहेत. रुग्णावर प्रत्यारोपण शस्त्रक्रिया यशस्वीरित्या पार पडली. अंगावर शहारा आणणारा हा प्रसंग पिंपरी चिंचवड ते चेन्नई दरम्यान घडला आहे.याबाबत अधिक माहिती अशी की, हृदय आणि फुप्फुस प्रत्यारोपण तज्ज्ञ डॉ. संजीव जाधव हे पिंपरी चिंचवड येथील डी. वाय. पाटील रुग्णालयात होते. तिथे त्यांनी एक शस्त्रक्रिया केली आणि पुढे ते चेन्नई येथील अपोलो रुग्णालयात फुप्फुस घेऊन शस्त्रक्रिया करण्यासाठी रुग्णवाहिकेतून निघाले होते. तिथून पुणे विमानतळाच्या दिशेने त्यांचा प्रवास सुरू झाला. मात्र सोमवारी सायंकाळी पाचच्या सुमारास पुण्यातील हॅरिस ब्रीज जवळ रुग्णवाहिकेचा टायर फुटला आणि चालकाचा वाहनावरील ताबा सुटला.
या रुग्ण वाहिकेने दोन तीन वाहनांना धडक देत शेवटी रुग्ण वाहिका डिव्हायडरमध्ये जाऊन अडकली. त्यामुळे सर्वांचेच प्राण वाचले. या रुग्ण वाहिकेत असणारे डॉ. जाधव आणि त्यांचे सहकारी जखमी झाले. मात्र त्यांना चेन्नई येथे पोहोचायचे होते. त्यामुळे दुसऱ्या रुग्णवाहिकेची वाट पाहण्यात अर्थ नव्हता. त्यामुळे त्यांनी पुणे विमानतळापर्यंत खाजगी वाहनाने प्रवास केला. तिथून ते काही वेळात चेन्नई येथे पोहोचले. पोहोचायला दोन तास उशीर झाला मात्र जखमी असणाऱ्या डॉ. जाधव यांनी त्या रुग्णावर यशस्वी शस्त्रक्रिया केली.चेन्नईतील अपोलो रुग्णालयात शस्त्रक्रिया करण्यात आलेला रुग्ण ७२ दिवस लाईफ सपोर्टवर होता. त्या रुग्णाला फुप्फुसाचा कर्करोग होता. शस्त्रक्रिया केल्यानंतर त्याची प्रकृती ठीक असल्याचे डॉक्टरांकडून सांगण्यात आले आहे. डॉक्टरांनी दाखवलेल्या प्रसंगावधानामुळे आमच्या रुग्णाचे प्राण वाचले असल्याची प्रतिक्रिया रुग्णाच्या नातेवाईकांनी दिली आहे. याबद्दल त्यांनी डॉक्टरांचे आभार देखील मानले आहेत. त्यांना सायंकाळी ६.३० वाजता शस्त्रक्रियेसाठी चेन्नई येथे पोहचायचे होते. मात्र दोन तासांच्या उशिरान म्हणजे ८.३० मिनिटांनी ते रुग्णालयात पोहचले मात्र, त्यांनी जखमी अवस्थेत देखील त्या रुग्णाचे प्राण वाचवले आहेत.
Users Today : 15