नागपूरच्या भाजी विक्रेत्यामुळे मिळाले तिघांना नवे जीवन; यकृत, किंडनीसह केले नेत्रदान

नागपूर : भाजी विक्री करून कुटुंबाचा उदरनिर्वाह करणाऱ्या दशरथ चकबले यांच्या अवयवदानामुळे तिघांना नवे जीवन मिळाले. एम्समधील हे पाचवे अवयवदान आहे.

कोंढाळी येथील ४६ वर्षीय भाजीविक्रेते दशरथ चकबले यांची अचानक प्रकृती बिघडल्याने त्यांना २१ नोव्हेंबर रोजी नागपुरात एम्समध्ये दाखल करण्यात आले. तीन दिवस त्यांच्यावर उपचार सुरू होते. चाचण्यांमध्ये मेंदूत रक्तस्राव झाल्याचे लक्षात आले. उपचारांना प्रतिसाद नसल्याने वैद्यकीय अधीक्षक डॉ. मनीष श्रीगिरीवार यांच्या नेतृत्वातील डॉ. उदित नारंग, डॉ. गुंजन घोडेस्वार, डॉ. वरिध कटियार या तज्ज्ञांच्या चमूने त्यांना मेंदुमृत घोषित केले. एम्सचे अवयवदान समन्वयक प्रीतम त्रिवेदी यांनी मृताचा भाऊ उदय, पत्नी शीला, मुलगा चंद्रशेखर यांच्याशी संवाद साधून त्यांना अवयवदानाचे महत्त्व पटवून दिले. त्यांनी संमती दिल्यानंतर विभागीय प्रत्यारोपण केंद्राला याबाबत कळविण्यात आले. या केंद्राने प्रतीक्षा यादी तपासून अवयवांचे वाटप निश्चित केले. त्यानुसार यकृत न्यू ईरा रुग्णालयात ५१ वर्षाच्या पुरुषावर प्रत्यारोपित करण्यात आले.१ किडनी एम्समध्येच ५१ वर्षाच्या पुरुष रुग्णाला देण्यात आली. दुसरी किडनी वैद्यकीयदृष्ट्या प्रत्यारोपणायोग्य नव्हती. महात्मे नेत्रपेढीला नेत्रदान करण्यात आले. एम्सतर्फे चकबले यांना श्रद्धांजली वाहण्यात आली तसेच त्यांचे पार्थिव कोंढाळी येथे पाठविण्याची नि:शुल्क व्यवस्था करण्यात आली.