कैद्याच्या पोटातील किल्लीचे गौडबंगाल; महिन्यात दुसऱ्यांदा आढळली चावी, कुठलं गुपित ‘कुलुपूबंद’?

या बंदिवानाच्या पोटात किल्ली जाते कोठून, यापूर्वी शस्त्रक्रिया झाली होती का, याबाबत वैद्यकीय अधिकाऱ्यांनी काहीही स्पष्ट केलेले नाही. कारागृह प्रशासनाने आता याबाबत चौकशी सुरू केल्याने यापूर्वी घडलेल्या घटनेचे गौडबंगाल काय हादेखील प्रश्न उपस्थित होत आहे. पोलिसांनी दिलेल्या माहितीनुसार, विजय रामचंद्र सोनवणे (वय ४४, मध्यवर्ती कारागृह) या बंदिवानाच्या पोटात असह्य वेदना सुरू झाल्याने त्याला जिल्हा शासकीय रुग्णालयात हलविण्यात आले.                   ही किल्ली नेमकी कसली?

दरम्यान, २८ ऑक्टोबर रोजीदेखील त्याला रुग्णालयात दाखल केले होते, तेव्हा वैद्यकीय अधिकाऱ्यांच्या तपासणीनंतर सुमारे दोन महिन्यांपूर्वीच या बंदिवानाने किल्ली गिळल्याचा संशय व्यक्त झाला होता. या बंदिवानाला किल्ली कोठून मिळाली, ही किल्ली नेमकी कसली आहे, त्याने किल्ली का गिळली असावी, किल्ली गिळल्यानंतर इतके दिवस तो शांत कसा राहिला, यासंदर्भातील तपास तेव्हाही करण्यात आला. मात्र, काही दिवसांनी त्याला कारागृहात पाठविण्यात आले. आता पुन्हा २५ नोव्हेंबरपासून हा बंदिवान जिल्हा रुग्णालयात त्याच वैद्यकीय कारणातून दाखल झाला आहे. त्यामुळे त्याने पुन्हा किल्ली गिळली, की यापूर्वी त्याच्यावर उपचार झालेच नव्हते, हा प्रश्न उपस्थित होत आहे. कारागृह प्रशासनालाही वैद्यकीय अधिकाऱ्यांनी फार माहिती न दिल्याने याबाबत शंका-कुशंका उपस्थित होत आहेत.