भरधाव दुचाकीची लिंबाच्या झाडाला धडक, भीषण अपघातात एकजण जागीच ठार

बुलढाणा : बुलडाणा जिल्ह्यातील धामणगाव बढे येथून जवळच असलेल्या रोहिणखेड येथील बारागाव पाणीपुरवठा योजनेच्या पाण्याच्या टाकीजवळ आज रविवारी सकाळी ९:३० वाजेच्या सुमारास भीषण अपघात झाला. एमएच २८ बीएन ९६२९ क्रमांकाच्या मोटरसायकलने लिंबाच्या झाडाला जोरदार धडक दिली. यामध्ये एक तरुण जागीच ठार झाला असल्याची माहिती आहे. तर दोघे गंभीररित्या जखमी आहेत.तिघेही एकाच मोटारसायकलवर धामणगाव बढेच्या दिशेने जात होते. जखमींना जिल्हा सामान्य रुग्णालयात पाठवण्यात आले असून पुढील तपासासाठी धामणगाव बढे पोलीस स्टेशनचे ठाणेदार सुखदेव भोरकडे घटनास्थळी पोहोचले आहे. मागील काही दिवसापासून जिल्ह्यातील दूचाकी चे मुख्यतः अपघाताचे प्रमाण वाढले आहे.सुसाट अनियंत्रित वेग यामुळे सदर अपघाताचे प्रमाण वाढत असल्याचे निदर्शनास येत आहे. अनेकवेळा समाज माध्यमातून रस्ते वाहतूकतिच्या बाबत सूचना दिशा निर्देश दिलेले असतात. पण सुसाट वेग अनियंत्रित वाहन चालवण्याच्या स्पर्धा यामुळे हे अपघात होत आहे. या अपघातांमध्ये दूचाकीचे प्रमाण वाढत असल्याचे निदर्शनास येत आहे.मुख्यतः या दुचाकी अपघातामध्ये युवक वर्गाचं प्रमाण वाढत असल्याच्या घटना समोर येत आहे. जिल्ह्यात समृद्धी महामार्गावर केव्हा अपघात होईल हे सांगता येत नाही. पण आता जिल्ह्यातील सुसाट झालेले शहरी रस्ते, ग्रामीण भागात विस्तारित होत चाललेले रस्त्याचे जाळे यामध्ये अपघाताचे प्रमाण वाढत चाललं आहे, असं म्हटलं तर वावगे ठरणार नाही.