छत्रपती संभाजीनगर : पोलिस आयुक्तालयाच्या जवळ असलेल्या भोईवाडा भागात व्हीआयपी रस्त्याच्या कडेला कन्नड कल्चरल क्लब असे नाव देऊन सुरू असलेल्या जुगार अड्ड्यावर पोलिस उपायुक्त नितीन बगाटे यांनी स्वत: पोलिस अधिकाऱ्यांसह छापा मारला. या कारवाईत जुगार खेळणाऱ्यांसह ४२ जणांना ताब्यात घेण्यात आले आहे. या कारवाईत लाखो रुपयांचा मुद्देमाल जप्त करण्यात आला. जुगार अड्डा चालविणाऱ्या राम बोडखेलाही ताब्यात घेण्यात आले
सोमवारी (२७ नोव्हेंबर) सायंकाळी ६.३० च्या दरम्यान शहर विभाग-एक पोलिस उपायुक्त नितीन बगाटे यांनी झोन-एक विभागाचे अधिकारी, कर्मचारी यांच्यासह क्रांती चौक पोलिस ठाण्याच्या विशेष पथकाचे कर्मचारी-अधिकारी यांच्यासह ही कारवाई केली.
मिल कॉर्नर ते वरद गणेश मंदिराकडे जाणाऱ्या रस्त्यावर तिबेटियन मार्केटच्या विरुद्ध बाजूला वाहनविक्रीच्या दुकानाच्या मागील बाजूला असलेल्या एका जुन्या होस्टेल केंद्राच्या टेरेसवर पोलिस उपायुक्त नितीन बगाटे आणि पोलिस अधिकारी पोहोचले. या ठिकाणी कन्नड कल्चरल व सोशल क्लबच्या नावाने सुरू असलेल्या जुगार अड्डा सुरू होता. या ठिकाणी विविध टेबलवर पत्त्यांचा जुगार चालत होता. जुगारासाठी प्लास्टिकची नाणी वापरण्यात येत होते. ही कारवाई ६.३० च्या दरम्यान करण्यात आली. या कारवाईत जुगार अड्डा चालविणाऱ्या राम बोडखे याला ताब्यात घेण्यात आले आहे. रात्री उशिरापर्यंत पोलिसांचा पंचनामा सुरू होता. या कारवाईत या कल्चरल क्लबमध्ये लाखो रुपयांचा जुगार सुरू होता. अशीही माहिती समोर आली आहे.छापा मारल्यानंतर जुगार अड्डा चालविणारा राम बोडखे यालाही ताब्यात घेण्यात आले. राम बोडखेने त्याच्या ‘ओळखी’बाबत पोलिस उपायुक्तांना सांगून त्यांना रोखण्याचा प्रयत्न केला. मात्र, पोलिस उपायुक्त नितीन बगाटे यांनी राम बोडखे यांना पोलिसी भाषेत कारवाईचा अर्थ समजावून सांगितल्यानंतर राम बोडखे गप्प बसून राहिला.जुगार अड्डाप्रकरणात पोलिस सामील?
पोलिस उपायुक्त नितीन बगाटे यांनी या जुगार अड्डयावर कारवाई केल्यानंतर, आसपासच्या लोकांनी हा जुगार अड्डा अनेक दिवसांपासून सुरू होता. अशी माहिती स्थानिकांनी दिली. राम बोडखे हा पोलिसांशी संपर्कात होता. त्यांच्या सहकार्याने जुगार अड्डा चालवित होता. याची कुणकुण पोलिस उपायुक्तांना लागल्यानंतर त्यांनी या जुगार प्रकरणात पोलिस अधिकारी किंवा कर्मचारी यांचे नाव आल्यास त्यांच्यावर गुन्हे दाखल करू, असे स्पष्ट संकेत नितीन बगाटे यांनी दिले.
Users Today : 15