अकोला: अकोला शहरात एका गावगुंडानं एका १४ वर्षीय अल्पवयीन मुलीवर अक्षरश: अमानवी अत्याचार केले आहेत. पिडीत मुलीला सिगारेटचे चटके देत, तिचं मुंडन करत तिच्यावर लैंगिक अत्याचार करण्यात आला आहे. यानंतर तिला सार्वजनिक स्थळी विवस्त्र करत अत्याचाराचा प्रयत्न करण्यात आला. याप्रकरणी खदान पोलिसांनी आरोपी गुंड गणेश कुमरे उर्फ गणीभाईला अटक करीत त्याच्यावर गुन्हे दाखल केले आहे. या घटनेने अकोला जिल्ह्यात एकच खळबळ उडाली आहे.अकोल्यात खरंच कायदा-सुव्यवस्था आहे का?
खळबळजनक आणि संताप आणणारी घटना अकोला शहरातील खदान पोलिस स्टेशनच्या हद्दीत घडली आहे. १४ वर्षीय अल्पवयीन मुलीवर सिगारेटचे चटके देत, तिचं मुंडन करीत तिच्यावर अमानवीय लैंगिक अत्याचार करण्यात आलेत. इतकंच नाही तर कैलासटेकडी स्मशानभूमी परिसरात पिडितेला विवस्त्र करीत तिची धिंड काढण्याचा प्रयत्नही झाला आहे.
शहरातील कैलास टेकडी भागात परिसरात गुंड गणेश कुमरे याची दहशत आहेय. पिडीत मुलीचे वडील मजुरी करतात. तिला एक मोठी बहीण आणि लहान भाऊ आहेय. गेल्या दोन वर्षांपासून या गुंडानं सातत्यानं दहशत माजवत मुलीवर सातत्याने अत्याचार केला आहे. मात्र, दोनदा पोलिसात जाण्याचा प्रयत्न करूनही पोलिसांच्या अक्षम्य दुर्लक्षामुळे निर्ढावलेल्या गावगुंडानं या मुलीचं अख्खं आयुष्यच बर्बाद केलं आहे. प्रकरण असंवेदनशीलपणे हाताळल्याचा आरोप
बुधवारी (१५ नोव्हेंबर) आणि गुरूवारी या गणेश नामक गुंडानं हैदोस घालत मुलीवर अनन्वित अत्याचार केला. शुक्रवारी या प्रकरणाची माहिती स्त्री चळवळीतील नेत्या आणि वंचितच्या प्रदेश महासचिव अरूंधती सिरसाट यांना मिळाली आणि या प्रकरणाला वाचा फुटली. मात्र, अकोल्यातील खदान पोलिसांनी हे प्रकरण असंवेदनशीलपणे हाताळल्याचा आरोप अरूंधती सिरसाट यांनी अकोला पोलिसांवर केला आहे.
दरम्यान, याप्रकरणी खदान पोलिसांनी आरोपी गुंड गणेश कुमरे उर्फ गणीभाईला अटक करीत त्याच्यावर गुन्हे दाखल केले आहे. ३६३, ३७६, ३५४,-बी, ३२३, ३२४,५०५, बाल सुरक्षा अधिनियम २०१२ नूसार ४ आणि ८ नूसार गुन्हे दाखल झाले. तर पिडीत मुलीची रवानगी बालसुधारगृहात करण्यात आली आहे. सध्या अकोला पोलिसांची यावर कोणतीही प्रतिक्रिया मिळू शकली नाही आहे. तर मुलीच्या समाजातील नेत्यांनी हा खटला जलदगती न्यायालयात चालवत मुलीच्या पुनर्वसनाची मागणी केली आहे. या अगोदर सुद्धा अकोला पोलिसांच्या अक्षम्य दुर्लक्षणामुळे १९ वर्षीय तरुणीला गमवावा लागला जीव
जिल्ह्यातील पातुरात १९ वर्षे तरुणीचा गळा आणि हात ओढणीने बांधलेल्या अवस्थेत मृतदेह आढळून आल्याने खळबळ उडाली होती. तिच्यावर अत्याचार करून तिला संपवलं होतं. या प्रकरणात एका आरोपीला अटकही झाली होती. परंतू तरुणीचा मृत्यू हा पातूर पोलिसांच्या हलगर्जीपणामूळे झाल्याचा आरोप झाला होता. कारण, ही तरुणी बेपत्ता होती तरी, पातूर पोलिसांनी हे प्रकरण गांभीर्यानं घेतलं नाही. पातूर पोलिस ठाण्यात कार्यरत असलेले पोलिस कॉन्स्टेबल शेगोकार हे पीडित मुलीच्या कुटुंबियांशी उद्धटपणाने वागले होते.कुटुंबियांनी शेगोकारकडे विनवणी केली असता ते म्हणाले, तुमच्या मुलीला लांडगा किंवा हत्तीने उचलून नेले असावे, अशा भाषेत उद्धटपणाने उत्तर या पोलिसांकडून मिळाली. यावेळी कुटुंबीयांकडून गजानन बळकर यांच्यावर संशय व्यक्त केला होता, तर त्यावर शेगोकार म्हणाले हा व्यक्ती असा करू शकत नाही, आता याबाबत चौकशी होणे अत्यंत गरजेचे आहे. दरम्यान या अगोदर पातूर पोलिसांकडे तीन वेळा तक्रार करूनही पातुर पोलिसांनी त्याकडे जाणीवपूर्वक दुर्लक्ष केलेलं होतं. त्यामुळेच या तरुणीची हत्या झालेली आहे, असा आरोप तेव्हा आमदार मिटकरींनी केला होता.
राज्यातील महिला आणि मुलींच्या सुरक्षेविषयी अनेकदा प्रश्न निर्माण करणार्या घटना सातत्याने घडताहेत. मात्र, पुरोगामी महाराष्ट्रातील या घटना थांबता थांबत नाहीयेत. अकोल्यातील घटना जितकी संतापजनक आहेय, तितकीच गंभीरही. आरोपी नराधम गुंडावर जलदगती न्यायालयात खटला चालवावा अशी मागणी आता नागरिकांमधून होत आहे.
Users Today : 15