गुप्तांग कापून रस्त्यात फेकलं, पुण्यातील अर्भकाचा मृत्यूशी लढा सुरूच; ससून रुग्णालयात उपचार

पुणे: गुप्तांग कापून रस्त्यावर टाकून दिलेल्या नवजात अर्भकाचा गेल्या सात दिवसांपासन मृत्यूशी लढा सुरू आहे. त्या अर्भकावर ससून रुग्णालयात अतिदक्षता विभागात उपचार सुरू असून त्याची प्रकृती चिंताजनक आहे. मूल जन्मल्यावर आनंदोत्सव साजरा करण्याऐवजी त्याच्या रक्तामासाच्या माणसांनीच त्याला मृत्यूच्या छायेत ढकलून दिल्याच्या या प्रकारामुळे हळहळ व्यक्त करण्यात येत आहे. हा प्रकार मुळशी तालुक्यातील पौड येथे घडला आहे.मुळशी तालुक्यात अकोले-शेरेगाव या दरम्यान असलेल्या पेट्रोल पंपाजवळील एका शेतामध्ये नागरिकांना २२ नोव्हेंबरला बेवारस अर्भक मिळून आले. अर्भकाच्या अंगावर जखमा होत्या. तसेच त्याचे गुप्तांग कापण्यात आल्याचेही दिसून आले. पौड पोलिसांना याबाबतची माहिती मिळताच त्यांनी घटनास्थळी धाव घेतली. त्यांनी अर्भकाला उपचारासाठी ससून रुग्णालयात पाठवले. दरम्यान अर्भकाला जीवे मारण्याच्या उद्देशाने त्याचे गुप्तांग कापण्यात आले. तसेच अन्य जखमा केल्या असाव्यात. या शक्यतेने पौड पोलिसांनी अज्ञाताविरोधात खुनाच्या प्रयत्नाचा गुन्हा दाखल करण्यात आला आहे.

पौड पोलिसांनी अर्भकाला ससून रुग्णालयात दाखल केले. अर्भक दाखल झाले तेव्हा त्याची प्रकृती चिंताजनक होती. त्याचे वजनही खूपच कमी होते. त्यामुळे अर्भक किती दिवसांचे असेल, याचे अंदाज डॉक्टरांना लावता येत नव्हता. गुप्तांग कापल्याने अर्भकाला मोठ्या प्रमाणावर संसर्ग झाला आहे. सध्या त्याच्यावर अतिदक्षता विभागात उपचार सुरू असून ते व्हेंटिलेटरवर आहे, अशी माहिती ससून रुग्णालयातील वैद्यकीय अधिकाऱ्यांनी दिली. प्रथमदर्शनी गुप्तांग शस्रक्रिया करून काढण्यात आले आहे का, अशी शंका उपस्थित झाली आहे. मात्र, त्याबाबत ठोस सांगता येत नसल्याचे स्थानिक पोलिसांनी सांगितले. त्याबाबत ससून रुग्णालय प्रशासनाकडे विचारणा केली आहे. मात्र, रुग्णालय प्रशासनाने देखील अद्याप काही कळवले नाही, असे तपास अधिकारी सहायक निरीक्षक स्वाती सूर्यवंशी यांनी ‘मटा’ला सांगितले.अर्भकाला शेतात फेकून दिल्याने त्या ठिकाणी कुत्रे किंवा जंगली प्राण्याने त्याच्यावर हल्ला केला आहे का, त्या हल्ल्यात प्राण्याने त्यांच्या गुप्तांगाला इजा पोहोचवली आहे का, या शंकेतून ससून रुग्णालय प्रशासनाने न्यायवैद्यक प्रयोगशाळेतील तज्ज्ञांचा सल्ला मागितला आहे. त्यानंतरच नेमके प्रकरण काय आहे, ते समोर येईल, असे ससून रुग्णालयातील वैद्यकीय अधिकाऱ्यांनी सांगितले. अर्भकाच्या आई-वडिलांचा शोध घेण्यात येत आहे; तसेच नागरिकांना काही माहिती असल्यास, त्यांनी पुढे यावे, असे आवाहन करण्यात आले आहे. त्याच्या प्रकृतीबाबत ससून रुग्णालय प्रशासनाशी सातत्याने संपर्क ठेवण्यात येत आहे, असं पौड पोलीस ठाण्याचे सहायक निरीक्षक स्वाती सूर्यवंशी म्हणाल्या.