फळभाजी विक्रेता जोरात बोलला, बेकरी चालक संतापला, दुकानातून काठी आणली अन्… नागपूर हादरलं

पोलिसांनी दिलेल्या माहितीनुसार, गजानन याचे घटाटेनगरमध्ये केक कलर्स बेकरी नावाचे दुकान आहे. त्याच्या दुकानासमोरच गेल्या चार वर्षांपासून प्रभुदयाल हे फळभाजीचे दुकान लावतात. मंगळवारी रात्री ९ वाजताच्या सुमारास प्रभुदयाल यांच्या पत्नी फळभाजी उचलून घरात ठेवत होत्या. याचदरम्यान प्रभुदयाल हे ओळखीच्या व्यक्तीसोबत जोराने बोलून शिवीगाळ करत होते. यावेळी गजानन आणि त्याच्या वडिलांनी प्रभुदयाल यांना ‘शिवीगाळ का करीत आहे’, असे म्हणत शिवीगाळ करण्यास मनाई केली. त्यामुळे दोघांमध्ये वाद झाला.संतप्त गजानन दुकानात गेला. त्यानंतर त्याने काठी आणली. काठीने प्रभुदयाल यांच्या डोक्यावर तीन वार केले. रक्ताच्या थारोळ्यात प्रभुदयाल खाली कोसळले आणि बेशुद्ध झाले. प्रभुदयाल यांचा मुलगा सुमित आणि गजानन या दोघांनी मोटारसायकलने त्यांना भवानी हॉस्पिटलमध्ये दाखल केले. प्रकृती चिंताजनक असल्याने प्रभुदयाल यांना मेयो हॉस्पिटलमध्ये दाखल करण्याचा सल्ला येथील डॉक्टरांनी दिला. मेयो हॉस्पिटलमध्ये दाखल केले असता डॉक्टरांनी प्रभुदयाल यांना मृत घोषित केले. याप्रकरणी पारडी पोलिसांनी खुनाचा गुन्हा दाखल करून गजाननला अटक केली.