पुणे : पुणे महानगर परिवहन महामंडळाने (पीएमपी) गर्दीच्या वेळी महिलांसाठी १९ मार्गांवर २४ महिला विशेष बस सोडण्याचे जाहीर केले होते; पण काही मार्गांवर महिला विशेष बस धावत नसल्यामुळे महिलांना पुन्हा त्रास सहन करावा लागतो आहे. त्यामुळे महिला प्रवाशांकडून ‘महिला विशेष बस कुठेय,’ असा प्रश्न पीएमपी प्रशासनाला विचारला जात आहे.
पुणे आणि पिंपरी-चिंचवड शहरात नोकरी, शिक्षणाच्या निमित्ताने पीएमपीने प्रवास करणाऱ्या महिलांची संख्या मोठी आहे. महिलांच्या सोईसाठी पीएमपीने १९ मार्गांवर २४ महिला विशेष तेजस्विनी बस सोडण्याचे जाहीर केले होते. गर्दीच्या वेळेत काही आणखी बस महिलांसाठी सोडण्याचा विचार ‘पीएमपी’कडून केला जात होता. काही दिवस महिला विशेष बस धावताना दिसल्या; पण अलिकडे बऱ्याच मार्गांवर महिला विशेष बस धावताना दिसत नाहीत. त्यामुळे महिलांना पुन्हा धक्के खाऊन असुरक्षितपणे प्रवास करावा लागत आहे. महिला बस नव्याने सुरू करण्याऐवजी आहे त्या बसच पीएमपीने कमी केल्याचे दिसून येत आहे. महिला बसमधून उत्पन्न कमी मिळत असल्यामुळे त्या कमी केल्याचे ‘पीएमपी’चे अधिकारी सांगत आहेत.महिलांना त्रासासोबत आर्थिक फटका
‘पीएमपी’च्या लांब पल्ल्याच्या मार्गावरील बसमध्ये दररोज मोठी गर्दी असते. विशेषतः सकाळी आठ ते ११ आणि रात्री पाच ते आठ या वेळात गर्दीचे प्रमाण जास्त असते. त्यामुळे बसमधील विद्यार्थिनी, महिला प्रवाशांना अडचणींचा सामना करावा लागत आहे. ‘पीएमपी’च्या २४ तेजस्विनी बसपैकी काही बसच सुरू आहेत. पीएमपी प्रशासनाकडून महिला विशेष बस कमी केल्याचा फटका महिलांना सहन करावा लागत आहे. बसमधील गर्दीत महिलांना त्रास होण्याबरोबरच त्यांच्याकडील मौल्यवान ऐवज चोरीला जाण्याचे प्रकार वाढले आहेत. त्यामुळे महिला विशेष बसची संख्या वाढविण्याची मागणी महिला प्रवाशांकडून केली जात आहे.‘पीएमपी’ने ‘तेजस्विनी’ म्हणून सुरू केलेले मार्ग
स्वारगेट ते येवलेवाडी, स्वारगेट ते हडपसर, अप्पा बळवंत चौक ते सांगवी, म.न.पा. भवन ते लोहगाव, कोथरूड डेपो ते विश्रांतवाडी, कात्रज ते महाराष्ट्र हौसिंग बोर्ड, कात्रज ते कोथरूड डेपो, हडपसर ते वारजे माळवाडी, भेकराईनगर ते म.न.पा. भवन, हडपसर ते वाघोली (केसनंद फाटा), अप्पर डेपो ते स्वारगेट, अप्पर डेपो ते पुणे स्टेशन बीरआरटी, अप्पर डेपो ते पुणे स्टेशन, म.न.पा. भवन ते आकुर्डी रेल्वे स्टेशन, निगडी ते पुणे स्टेशन (औंध मार्गे), निगडी ते भोसरी, निगडी ते हिंजवडी माण- फेज-३, चिंचवडगाव ते भोसरी, चिखली ते डांगे चौक.
अलीकडे खूपच तेजस्विनी बस रस्त्यावर दिसतात. त्यांनी या बस का बंद केल्या, हे समजत नाही. महिला विशेष बस बंद केली, तर प्रवासी कोठून येणार? तेजस्विनी बस येत नाहीत, मग त्यांना दुसऱ्या बसने जावे लागते. त्यामुळे या बस पुन्हा सुरू कराव्यात.- आशा शिंदे, प्रवासी
Users Today : 15