पुणे : एकटेपणा आणि आजारपणाला कंटाळून कोथरूडमधील मयूर कॉलनी परिसरात राहणाऱ्या एका वृद्धाने दुसऱ्या मजल्यावरील गॅलरीमधून उडी मारून आत्महत्या केल्याची घटना रविवारी दुपारी घडली.मकरंद महादेव मेंगाळे (वय ८९) असे आत्महत्या केलेल्या वृद्धाचे नाव आहे. मेंगाळे हे मयूर कॉलनीतील महादेव स्मृती अपार्टमेंट येथे राहत होते. त्यांची दोन मुले अमेरिकेत स्थायिक आहेत. एक मुलगा मुंबई येथे स्थायिक आहे. मेंगाळे यांच्या पत्नीचे पूर्वीच निधन झालेले आहे. त्यामुळे मेंगाळे पुण्यात एकटेच राहत होते. त्यांचा सांभाळ करण्यासाठी मुलाने २४ तास ‘केअर टेकर’ नेमला होता. तो दुपारी, रात्री त्यांचा जेवणाचा डबा आणण्यासाठी जात होता. नेहमीप्रमाणे ‘केअर टेकर’ रविवारी दुपारी एकच्या सुमारास मेंगाळे यांचा दुपारच्या जेवणाचा डबा आणण्यासाठी घराबाहेर गेला. त्या वेळी मेंगाळे ‘वॉकर’च्या साह्याने घरातून बाहेर पडले. ते दुसऱ्या मजल्यावरील गॅलरीत गेले. तेथून त्यांनी उडी मारून जीवन संपवले. दरम्यान, इमारतीत खाली उभ्या असलेल्या काही लोकांना मेंगाळे यांना उडी मारताना पाहिले. मात्र, ते काहीही करू शकले नाहीत.रक्तदाब, मधूमेह अन् वॉकर…
मेंगाळे घरात एकटे राहत असल्याने त्यांच्यावर देखरेख ठेवण्यासाठी मुलाने घरामध्ये ‘सीसीटीव्ही’ कॅमेरे बसविले होते. वडील काय करतायेत, ‘केअर टेकर’ त्यांची नीट काळजी घेत आहे ना, हे मुलगा त्याद्वारे पाहत असे. या घटनेनंतर मुलगा पुण्यात दाखल झाला. पोलिसांनी त्याच्याकडून ‘सीसीटीव्ही’ चित्रीकरण पाहिले. त्यामध्ये ‘केअर टेकर’ मेंगाळे यांच्याशी बोलून घराबाहेर पडल्याचे दिसून येते. त्यानंतर काही वेळाने मेंगाळे ‘वॉकर’ घेऊन घराबाहेर पडल्याचे दिसून आले.
आजारपण आणि एकटेपणाला कंटाळून मकरंद मेंगाळे यांनी आत्महत्या केली. त्यांनी आत्महत्येपूर्वी चिठ्ठी लिहून ठेवली होती. त्यांच्या मुलाला घडलेली घटना कळवल्यानंतर तो मुंबईवरून पुण्यात आला. मेंगाळे यांचे पार्थिव शवविच्छेदनासाठी ससून रुग्णालयात पाठविण्यात आले.- हेमंत पाटील, वरिष्ठ निरीक्षक, कोथरूड पोलिस ठाणे
Users Today : 18