पुणे (इंदापूर) : पुणे जिल्ह्यातील इंदापूर तालुक्यातील पोंधवडी गावच्या हद्दीतील विहिरीत माय-लेकीचे मृतदेह आढळल्याने एकच खळबळ उडाली आहे. ही हत्या की आत्महत्या याचा तपास भिगवण पोलिसांनी सुरू केला आहे.
३१ वर्षीय आईसह दीड वर्षीय चिमुकलीचा मृतदेह पोलिसांना शनिवारी विहिरीत आढळला. धनश्री केतन मदने (वय ३१), परी केतन मदने (वय दीड वर्ष) अशी या मायलेकींची नावे आहेत. भिगवण पोलीस ठाण्यात मायलेकी हरवल्याबाबत धनश्री मदने हिच्या वडील नामदेव जंगलू कोकरे (खातगांव, ता. करमाळा, जि. सोलापूर) यांनी तक्रार दाखल केली होती. त्यानंतर शनिवारी (दि.२) या दोघींचेही मृतदेह पोंधवडी येथील एका विहिरीत आढळून आले.
भिगवण पोलिसांनी दोन्ही मृतदेह पुणे येथील शासकीय रुग्णालयात पाठवले आहेत. ही हत्या की आत्महत्या याचा तपास केला जात आहे, असे भिगवण पोलीस ठाण्याचे पोलीस निरीक्षक दिलीप पवार यांनी सांगितले. मिळालेल्या माहितीनुसार, धनश्री कोणालाही न सांगता चिमुकलीसह घरातून निघून गेली होती. तिचा शोध सुरू असताना एका विहिरीत धनश्री पडली असल्याची माहिती मिळाली. यावेळी नातेवाईकांनी घटनास्थळी जाऊन पाहिले असता अकोले गावच्या हद्दीत अलका शिवाजी पवार यांच्या विहिरीत धनश्री यांच्या कडेला बाळ घेतल्याच्या स्थितीत मृतदेह आढळून आला.
Users Today : 18