चेष्टेत कॉम्प्रेसर पाईपमधील हवा पोटात सोडल्याने मुलाचा मृत्यू; पुण्यातील धक्कादायक घटना

पुणे : चेष्टा मस्करीतून काॅम्प्रेसर यंत्रातील हवा पाईपद्वारे अल्पवयीन मुलाच्या पोटात सोडल्याने त्याचा मृत्यू झाल्याची घटना पुण्यातील हडपसर औद्योगिक वसाहतीतील एका कारखान्यात घडली. या प्रकरणी पोलिसांनी एका तरुणाला अटक केली आहे.

मोतीलाल साहू (वय १६, मूळ रा. मध्य प्रदेश) असे मृत्यूमुखी पडलेल्या मुलाचे नाव आहे. त्याच्या मृत्यूस कारणीभूत ठरल्याप्रकरणी कारखान्यातील कामगार धीरजसिंग गोपालसिंग गौड (वय २१) याला अटक करण्यात आली आहे. याबाबत मोतीलालचा मामा शंकरदिन रामदिन साहू (वय ३४, रा. बडागाव, जि. कटनी, मध्य प्रदेश ) यांनी हडपसर पोलिस ठाण्यात फिर्याद दिली आहे. हडपसर येथील औद्योगिक वसाहतीत पूना फ्लोअर अँड फूड्स कारखाना आहे. या कारखान्यात मोतीलालचा मामा शंकरदिन आणि आरोपी धीरजसिंग कामाला आहे. कारखान्यातील आवारात ते राहायला आहेत.